नागपूर - गेले काही दिवस राज्यभर गाजत असलेल्या बोगस शालार्थ आयडी, शिक्षक व शिक्षकेतर भरती घोटाळ्यात फरार असलेला संगणकीय हेराफेरी करणारा महत्त्वाचा आरोपी लक्ष्मण उपासराव मंघाम तसेच माजी उपसंचालक अनिल पारधी या दोघांना विशेष तपास पथकाने अटक केली आहे.
नुकतीच विशेष तपास पथक अर्थात एसआयटी ची स्थापना करण्यात आली. त्यानंतर या दोघांना अटक करण्यात आल्याने आता चौकशीत महत्त्वाचे धागेदोरे पुढे येण्याची शक्यता आहे. बनावट शालार्थ आयडी च्या माध्यमातून शिक्षक व शिक्षकेतर कर्मचाऱ्यांची नियुक्ती प्रकरणी सायबर तसेच सदर पोलिसांनी विभागीय शिक्षण उपसंचालक उल्हास नरड, शिक्षक पराग पुडके, निलेश मेश्राम, भारत ढवळे, सुरज नाईक, संजय बडोदकर यांना अटक केली.
नरड यांच्या चौकशीत संगणकाच्या बाबतीत निष्णात असलेल्या मंघम याचे नाव समोर आले. बोगस आयडी तयार करण्यासाठी ज्या आयपी ॲड्रेसचा वापर झाला त्यातील सर्वाधिक आयपी हे फरार आरोपी मंघम याचे होते असेही चौकशीत पुढे आले. सायबर पोलीस ठाण्याचे वरिष्ठ पोलीस निरीक्षक बळीराम सुतार, पोलीस ठाण्याचे वरिष्ठ पोलीस निरीक्षक मनीष ठाकरे यांच्या मार्गदर्शनाखाली वाडी परिसरात सापळा रचून पोलिसांनी मंगमला अटक करीत सायबर पोलिसांचे स्वाधीन केले.
