नागपूर - नागपूर ते नागभीड हा १०६ किलोमीटरचा नॅरोगेज लोहमार्ग ब्रॉड गेजमध्ये रुपांतरीत करण्याचे काम गतीने पूर्ण होत असून, दिवाळीपूर्वी इतवारी ते उमरेड या ५१ किमी मार्गाचे लोकार्पण होईल अशी माहिती परिवहन मंत्री प्रताप सरनाईक यांनी दिली. ते मंत्रालयात महारेल कार्पोरेशनच्या कामाच्या आढावा बैठकीमध्ये बोलत होते. या बैठकीला महारेल कार्पोरेशनचे उपाध्यक्ष जैस्वाल, परिवहन विभागाचे उपसचिव किरण होळकर व संबंधित अधिकारी उपस्थित होते.
सरनाईक म्हणाले , नागपूर जवळील इतवारी स्थानकापासून नागभीड पर्यंत सुमारे १०६ किलोमीटरचा नॅरोगेज लोहमार्ग ब्रॉडगेजमध्ये रूपांतरित करण्याचे काम लवकरच पूर्ण करण्याचे निर्देश महारेल कार्पोरेशनला दिले आहेत.या लोहमार्गाच्या नुतनीकरणामुळे १२-१४ छोट्या मोठ्या गावांना लोहमार्गाने नागपूर सारख्या महानगराशी जोडता येईल.
सन. २०१६ मध्ये महाराष्ट्र शासन व केंद्रीय रेल्वे मंत्रालय यांच्या संयुक्त भागीदारीतून महारेल कार्पोरेशन या संस्थेची स्थापना केली. मुख्यमंत्री देवेंद्र फडणवीस यांच्या संकल्पनेतून साकारत असलेला " रेल्वे फाटक मुक्त महाराष्ट्र " हा प्रकल्प म्हणजे महाराष्ट्रातील सर्व रेल्वे फाटकाचे रूपांतर रेल्वे उड्डाणपूल मध्ये करण्याची मोठी जबाबदारी महारेल कार्पोरेशनवर टाकण्यात आली आहे. हे रेल्वे उड्डाणपूल देखील गतीने पूर्ण करण्याच्या सूचना मंत्री सरनाईक यांनी महारेल कार्पोरेशनला दिल्या.
