Dr Sameer Paltewar bail rejected
नागपूर: मेडिट्रिना हॉस्पीटल प्रकरणी डॉ. समीर नारायण पालटेवार आणि इतर १३ आरोपींचा कथित आर्थिक गैरव्यवहार प्रकरणातील अटकपूर्व जामिनाचा अंतरिम अर्ज अतिरिक्त सत्र न्यायाधीश, यांनी फेटाळला आहे.
न्यायालयाने स्पष्ट केले की आरोपींनी मोठ्या प्रमाणात निधी स्वीकारून त्याचा अपहार केला असून, दस्तऐवज बनावट करण्यासह गंभीर स्वरूपाचे आरोप आहेत. तपास सुरू असल्याने आणि आरोप गंभीर स्वरूपाचे असल्यामुळे या टप्प्यावर अटकपूर्व संरक्षण देणे योग्य ठरणार नाही.
दरम्यान, १७ सप्टेंबर २०२५ रोजी आर्थिक गुन्हे शाखेने सीताबर्डी पोलिसांतर्फे डॉ. पालटेवार, त्यांची पत्नी सोनाली आणि इतर १६ जणांविरुद्ध रामदासपेठ येथील मेडिट्रिना हॉस्पिटलमधील मोठ्या आर्थिक गैरव्यवहार प्रकरणी पाचवा गुन्हा नोंदविला आहे. रुग्णालयाचे सह-संस्थापक गणेश चक्करवार यांनी दाखल केलेल्या तक्रारीत, २०२० ते २०२४ या कालावधीत खोट्या कन्सल्टन्सी व मार्केटिंग बिलांच्या माध्यमातून तब्बल १६.८३ कोटींचा निधी वळविण्यात आल्याचा आरोप आहे. याशिवाय, नागपूर महानगरपालिकेने विविध नियमभंग प्रकरणी या हॉस्पिटलविरुद्ध कारवाई सुरू केली आहे. अग्निशमन विभागाने अग्निसुरक्षेच्या साधनांचा अभाव असल्यामुळे रुग्णालय असुरक्षित ठरविले असून, आरोग्य विभागाने हॉस्पिटलचे आयपीडी नोंदणी रद्द करण्याची प्रक्रिया देखील हाती घेतली आहे.
