नागपूर : HMPV Virus | नागपुरात दोघांना बहुचर्चित ह्युमन मेटान्युमिनो विषाणूचा (एचएमपीव्ही) संसर्ग झाला असल्याची माहिती मिळत आहे. दोन लहान मुलांचा रिपोर्ट एचएमपीव्ही पॉझिटिव्ह आला आहे. ७ वर्षीय मुलगा आणि १३ वर्षीय मुलीचा रिपोर्ट ३ जानेवारीला खासगी रुग्णालयात पॉझिटिव्ह आला. या दोन्ही मुलांना खोकला आणि ताप होता. दोन्ही रुग्ण आजारातून बरे झाल्याचीही माहिती आहे.
देशात सहा बाळांना बहुचर्चित ह्युमन मेटान्युमिनो विषाणूचा (एचएमपीव्ही) संसर्ग झाला असल्याची माहिती केंद्रीय आरोग्य मंत्रालयाने सोमवारी दिली. त्यात कर्नाटकातील दोन, गुजरातमधील एक, तामिळनाडूतील दोघांचा समावेश आहे. त्यामुळे याबाबत भीतीचे वातावरण निर्माण झाले असतानाच हा विषाणू काही नवीन नाही, असे स्पष्टीकरण आरोग्य मंत्रालयाच्या वतीने देण्यात आले आहे. श्वसनाच्या विकाराशी संबंधित रुग्णांवर नियमित देखरेख ठेवण्यात येते. त्यात हे रुग्ण आढळले आहेत.
