Nagpur Lost Cash Found
नागपूर : आजच्या काळातही समाजात प्रामाणिकपणा आणि माणुसकी जिवंत असल्याचे प्रेरणादायी उदाहरण नागपूर शहरातील पोलीस ठाणे सदरच्या हद्दीत समोर आले आहे. रस्त्यावर बेवारस अवस्थेत आढळलेली १५ हजार रुपयांची रोख रक्कम स्वतःकडे न ठेवता ती पोलिसांच्या स्वाधीन करून मनीष कॉलनी, काटोल रोड येथील ७५ वर्षीय सेवानिवृत्त नागरिक आनंद माणिक पंचभाई यांनी प्रामाणिकपणाचा आदर्श घालून दिला आहे.
प्राप्त माहितीनुसार, १४ ऑक्टोबर २०२६ रोजी आनंद पंचभाई यांना पोलीस नियंत्रण कक्षाजवळील वर्दळीच्या ठिकाणी रस्त्यावर खाकी रंगाचा एक लिफाफा बेवारस अवस्थेत पडलेला आढळला. त्यांनी लिफाफा उघडून पाहिला असता, त्यामध्ये १५ हजार रुपयांची रोख रक्कम असल्याचे निदर्शनास आले. ही रक्कम नेमकी कोणाची आहे, याची माहिती नसल्याने त्यांनी ती स्वतःकडे न ठेवता प्रामाणिकपणे पोलीस ठाणे सदर येथे जमा करण्याचा निर्णय घेतला.
त्यानुसार, पंचभाई यांनी सदर लिफाफा व त्यातील रोख रक्कम पोलीस ठाणे सदरचे वरिष्ठ पोलीस निरीक्षक ज्ञानेश्वर भेदोडकर यांच्याकडे सुपूर्द केली. वयाच्या ७५ व्या वर्षीही त्यांनी दाखविलेली प्रामाणिकता, सामाजिक बांधिलकी आणि नैतिक मूल्यांप्रती असलेली निष्ठा कौतुकास्पद ठरत आहे.
सापडलेली रक्कम स्वतःकडे ठेवण्याचा मोह टाळून ती पोलिसांच्या स्वाधीन करण्याची त्यांची कृती समाजातील इतर नागरिकांसाठी प्रेरणादायी आहे. आनंद पंचभाई यांच्या या कृतीतून प्रामाणिकपणा आणि माणुसकी हीच समाजाची खरी संपत्ती असल्याचा संदेश मिळतो. अशा नागरिकांमुळे समाजातील परस्परविश्वास आणि सद्भावनेची भावना अधिक दृढ होत आहे.
