नागपूर - राज्यपाल तथा कुलपती आचार्य देवव्रत यांनी आज डॉ मनाली मकरंद क्षीरसागर यांची नागपुरातील राष्ट्रसंत तुकडोजी महाराज नागपूर विद्यापीठाच्या कुलगुरूपदी निवड जाहीर केली.
डॉ.मनाली क्षीरसागर या स्थानिक यशवंतराव चव्हाण अभियांत्रिकी महाविद्यालय येथे संचालिका (तांत्रिक) व सल्लागार पदावर कार्यरत आहेत. सातत्याने प्रभारींच्या खांद्यावर जबाबदारी असल्याने गेले अनेक दिवस नागपूरच्या राष्ट्रसंत तुकडोजी महाराज नागपूर विद्यापीठाला पूर्णवेळ कुलगुरूची प्रतीक्षा होती.
एका स्वतंत्र आदेशाद्वारे राज्यपाल देवव्रत यांनी डॉ. पंजाबराव देशमुख कृषी विद्यापीठ अकोला येथील माजी संशोधन संचालक डॉ.विलास काशिनाथ खर्चे यांची राहुरी येथील महात्मा फुले कृषी विद्यापीठाच्या कुलगुरूपदी नियुक्ती केली आहे. दोन्ही कुलगुरूंच्या नियुक्त्या पाच वर्षांच्या कार्यकाळासाठी किंवा ते वयाची पासष्ट वर्षे पूर्ण करतील, यापैकी जी तारीख अगोदर असेल त्या तारखेपर्यंत असतील.
