Opposition Leader Maharashtra Issues
नागपूर : नागपुरातील हिवाळी अधिवेशन सुरू होण्यापूर्वीपासून विरोधी पक्षनेतेपदाचा मुद्दा तापलेला आहे. आज दुसऱ्या दिवशी काँग्रेसचे गटनेते विजय वडेट्टीवार यांचे नाव विरोधी पक्षनेते म्हणून पुढे आले. या पार्श्वभूमीवर दस्तुरखुद्द वडेट्टीवार यांनी मात्र ‘माझ्या नावासंदर्भात कुणीही माझ्याशी चर्चा केलेली नाही. माझे नाव कसे पुढे आले, याचा शोध घ्यावा लागेल,’असे वक्तव्य मंगळवारी (दि.९) विधानभवन परिसरात प्रसारमाध्यमांशी बोलताना केले.
अधिवेशनाच्या पहिल्या दिवसापासून विरोधी पक्षनेतेपदासाठी वेगवेगळी नावे पुढे येत आहेत. सोमवारी आदित्य ठाकरे, भास्कर जाधव यांची नाव पुढे आली. आज, मंगळवारी विजय वडेट्टीवारांच्या नावाची चर्चा सुरू झाली. याबाबत त्यांना विचारले असता ते म्हणाले,‘महाविकास आघाडीच्या नेत्यांनी विधानसभेसाठी शिवसेनेचे भास्कर जाधव आणि विधान परिषदेसाठी काँग्रेसचे सतेज पाटील यांच्या नावाची शिफारस केली होती. दोन महिन्यांपूर्वी मुख्यमंत्र्यांशी भेटून विरोधी पक्षनेतेपद द्या, अशी मागणीही करण्यात आली होती.
मात्र, माझ्या नावासंदर्भात कुणीही माझ्याशी चर्चा केलेली नाही. त्यामुळे माझे नाव पुढे कसे आले, याचा शोध घ्यावा लागेल.’ तसेच भाजपला वडेट्टीवार विरोधी पक्षनेते म्हणून चालतात यासंदर्भात मला मुख्यमंत्र्यांनाच विचारावे लागेल, असा टोला देखील लगावला.
दरम्यान,शिवसेनेचे ज्येष्ठ नेते अंबादास दानवे यांनी एक्सवर व्हिडीओ पोस्ट केला आहे. यात एक आमदार पैशांच्या गड्ड्यांसह दिसत असून तो आमदार कोण, असा सवाल दानवे यांनी केला आहे. याबाबत बोलताना वडेट्टीवार यांनी सरकारने या संपूर्ण प्रकरणाची चौकशी करावी, अशीही मागणी केली. शिवसेनेला टार्गेट केले जात आहे, असे म्हणणे चुकीचे होईल. बॅगांमध्ये पैसे सापडले, असे आरोप होत असतात. कुणी आरोप केला की लगेच फाशी द्यायची, असे होत नाही. चौकशीमध्ये सर्व सिद्ध होईल. कावळ्याच्या शापाने गाय मरत नाही. अंबादास दानवे सुशिक्षित बेरोजगार राजकारणी आहेत, असे पाणीपुरवठा मंत्री गुलाबराव पाटील म्हणाले होते.
