Nagpur sexual abuse case
नागपूर : नग्नपुजा केल्यास पैशाचा पाऊस पाडून दाखवतो, असे आमिष देत एका भोंदू बाबाने आपल्या सहकाऱ्यांच्या मदतीने ३ अल्पवयीन मुलींवर गुंगीचे औषध देऊन अत्याचार केल्याची घटना मानकापूर पोलिस स्टेशनच्या हद्दीत उघडकीस आली आहे. याप्रकरणी भोंदूबाबा अब्दुल कदीर उर्फ कदिलबाबा, त्याचा सहकारी आशिष, त्याची मैत्रीण आणि त्यांचे परिचित इतर दोघे अशा एकंदर ५ जणांना अटक करण्यात आली आहे. त्यांना दि. २५ एप्रिलपर्यंत न्यायालयाने पोलीस कोठडी सुनावली आहे.
अंधश्रद्धेच्या नावाखाली सुरू असलेल्या या विकृत प्रकरणी पोलिसांनी मात्र आरोपी आणि पीडित यांच्याविषयी तूर्तास गोपनीयता बाळगली आहे. अब्दुल कदीर उर्फ कदिलबाबा असे या भोंदूबाबाचे नाव आहे. त्याने आपला मित्र आशिष व त्याची एक लिव्ह इन रिलेशनशिपमध्ये राहणारी मैत्रीण यांच्या मदतीने ही नग्नपूजा आणि हा सर्व विकृत खेळ रविवारी मध्यरात्री मांडला होता. यासाठी त्यांनी तीन गरीब अल्पवयीन तरुणींना पैशाचे आमिष दाखवत यात सहभागी करून घेतले. तुम्ही केवळ कपडे काढून दाखवा, मी पैशाचा पाऊस पाडतो. आपण सर्व श्रीमंत होऊ, अशा प्रकारची बतावणी त्याने केली.
मात्र, पूर्वनियोजित प्रकारातून या मुलींना पूजेच्या निमित्ताने कसले तरी गुंगीचे औषध देण्यात आल्याची माहिती पुढे आली असून या रात्रीच्या अत्याचार प्रकरणाची वाच्यता सकाळी या मुलींनी आपल्या एका मित्राजवळ केली असता त्याने थेट पोलीस स्टेशन गाठले. तक्रारीवरून भोंदूबाबा व त्याचा सहकारी यांना पोलिसांनी अटक केली.
हा आरोपी सराईत असावा त्याने यापूर्वी देखील अनेकांची अशी फसवणूक,अत्याचार केला असण्याची शक्यता पोलिसांनी वर्तविली असून या प्रकरणी काही व्हिडीओ रेकॉर्ड झालेत का, याचीही चौकशी आता पोलिस करीत असून या सामाजिक विकृतीचा वेळीच कठोर कारवाईतून बंदोबस्त केला जावा, अशी मागणी होऊ लागली आहे.
