गोंदिया, पुढारी वृत्तसेवा :मुख्यमंत्री तिर्थदर्शनयोजनेअंतर्गत गोंदिया जिल्ह्यातील ५६९ ज्येष्ठ नागरिकांचे प्रस्ताव पालकमंत्री धर्मरावबाबा आत्राम यांचे अध्यक्षतेखालील समितीमार्फत मंजूर करण्यात आले. तेव्हा ६० वर्षे व त्यावरील ज्येष्ठ नागरिक लवकरच भारतातील तिर्थक्षेत्राची वारी करणार असून देवदर्शन करणार आहेत. राज्यातील सर्व धर्मियांतील ६० वर्षे व त्यावरील ज्येष्ठ नागरिकांना भारतातील तिर्थक्षेत्रांना भेट देण्याची इच्छा पूर्ण करण्यासाठी “मुख्यमंत्री तिर्थदर्शन योजना" राबविण्यास शासनाने मान्यता दिलेली आहे. या अनुषंगाने जिल्ह्याचे पालकमंत्री धर्मरावबाबा आत्राम यांच्या अध्यक्षतेखालील समितीमार्फत ५६९ अर्जांना मंजूरी देण्यात आली आहे.
सदर योजनेअंतर्गत गोंदिया जिल्ह्यात वैष्णोदेवी मंदिर कटरा (जम्मू व काश्मिर) तिर्थक्षेत्राकरीता १३६ ज्येष्ठ नागरीकांची, श्रीराम मंदीर अयोध्या (उत्तरप्रदेश) तिर्थक्षेत्राकरीता २४०, महाबोधी गया तिर्थक्षेत्राकरीता ३३, काशी तिर्थक्षेत्राकरीता २६, विठोबा पंढरपूर तिर्थक्षेत्राकरीता ३२, तिरुपती बालाजी तिर्थक्षेत्राकरीता १७, द्वारकाधीश तिर्थक्षेत्राकरीता ७, काशी विश्वनाथ तिर्थक्षेत्राकरीता ४५, गंगोत्री मंदीर उत्तरकाशी तिर्थक्षेत्राकरीता २, महाकालेश्वर उज्जैन मंदीर तिर्थक्षेत्राकरीता १०, साईबाबा देवस्थान शिर्डी तिर्थक्षेत्राकरीता ८, सिद्धीविनायक मंदीर तिर्थक्षेत्राकरीता ५, केदारनाथ तिर्थक्षेत्राकरीता ३, अजमेर दर्गा तिर्थक्षेत्राकरीता ३, जगन्नाथ पुरी तिर्थक्षेत्राकरीता १, रामेश्वरम तिर्थक्षेत्राकरीता १, असे एकूण १६ तिर्थक्षेत्राकरीता एकूण ५६९ ज्येष्ठ नागरिकांची निवड करण्यात आली आहे. दरम्यान, ज्येष्ठ नागरिक लवकरच श्रीराम मंदिर, अयोध्या ची मोफत वारी करणार आहेत.