गोंदिया, पुढारी वृत्तसेवा : गोवंशीय जनावरांना कत्तलखान्यात घेऊन जात असलेल्या दोन गो-तस्करांना नवेगावबांध पोलिसांनी नाकाबंदी कारवाई करून ताब्यात घेतले. या प्रकरणी पोलिसांनी सात जनावरांसह ६ लाख ८० हजार रुपयांचा मुद्देमाल जप्त केला. नरेंद्र तांडेकर ( वय. ३८) व आशीष कोल्हे (वय. २२) अशी दोन्ही गो-तस्करांची नावे आहेत.
माहितीनुसार, जिल्ह्याच्या अर्जुनी-मोरगाव तालुक्यातील नवेगावबांध पोलीस ठाण्याच्या हद्दीतुन दोघेजण पिकअप वाहनातून अवैध जनावरांची वाहतूक करून कत्तलखान्यात घेऊन जात होते. ही गुप्त माहिती नवेगावबांध पोलिसांना मिळाली. मिळालेल्या माहितीच्या आधारावर नवेगावबांध पोलीसांनी (दि. ३) रात्री ११ वाजताच्या सुमारास नवेगावबांध ते धाबेपवनी मार्गावर सापळा रचून नाकाबंदी कारवाई केली. यावेळी एका पांढऱ्या रंगाच्या महिंद्रा बोलेरो पिकअप मालवाहु वाहनास थांबवुन तपासणी केली असता आरोपी नरेंद्र तांडेकर व आशीष कोल्हे हे दोघेही वाहनात ७ गोवंश जनावरांना चारा-पाण्याची व्यवस्था न करता क्रूरपणे कोंबून वाहतूक करत असल्याचे दिसून आले.
दरम्यान दोघांना सदर जनावरांबाबत विचारपूस केली असता अवैधरित्या कत्तलीकरिता वाहतूक करीत असल्याचे निदर्शनास आले. या प्रकरणी पोलिसांनी वाहन व पशुधन असा ६ लक्ष ८० हजार रुपयाचा मुद्देमाल ताब्यात घेतला असून ७ जनावरांची सुटका केली. दोन्ही आरोपींच्या विरोधात नवेगावबांध पोलीस ठाण्यात गुन्हा दाखल करण्यात आला आहे. पुढील तपास पोलीस करीत आहेत.
