अमरावती, पुढारी वृत्तसेवा : देशातील प्रथम कृषिमंत्री डॉ. पंजाबराव उपाख्य भाऊसाहेब देशमुख यांनी स्थापन केलेल्या श्री शिवाजी शिक्षण संस्थेच्या निवडणुकीत धक्काबुक्की झाली. मतदान केंद्रावर मतदारांना आकर्षित करण्याच्या प्रकारावरून दोन्ही पॅनलचे पदाधिकारी आमने-सामने येत हा धक्काबुक्कीचा प्रकार घडला. पंचवटी चौकातील शिवाजी शारीरिक शिक्षण महाविद्यालय या मतदान केंद्रावर ही घटना रविवारी (दि.११) सकाळी ११.४५ वाजता घडली. यावेळी पोलिसांनी लाठी चार्ज करत सहा जणांना ताब्यात घेतले.
श्री शिवाजी शिक्षण संस्थेची पंचवार्षिक निवडणूक प्रक्रिया शिवाजी शारीरिक शिक्षण महाविद्यालयात पार पडली. विद्यमान अध्यक्ष तथा राज्याचे माजी कृषिमंत्री हर्षवर्धन देशमुख यांच्या नेतृत्वात प्रगती तर विद्यमान उपाध्यक्ष तथा माजी आमदार नरेशचंद्र ठाकरे यांच्या नेतृत्वात विकास या दोन पॅनल दरम्यान लढत झाली. मतदान केंद्रात एक वृध्द आजीवन सभासद मतदान करण्यासाठी गेले असता, त्यांनी केअर टेकर म्हणून एक प्रतिनिधी मदत करीत होता. याच ठिकाणी उपस्थित असलेले प्रगती पॅनलच्या उमेदवारांनी त्यांच्याशी बोलण्याचा प्रयत्न केला. त्यावेळी विकास पॅनलच्या पदाधिकार्यांनी येथे तुमच्यासोबत इतर पक्षाचे नेते उपस्थित कशासाठी असा आक्षेत घेतला. याच वेळी वरुडचे आमदार देवेंद्र भूयार मतदान केंद्रात आले.
दरम्यान, दोन्ही पॅनलच्या कार्यकर्त्यामध्ये बाचाबाची झाली. त्यानंतर हा वाद चांगलाच विकोपाला गेला. यावेळी पोलिसांना पाचारण करण्यात आले. गाडगेनगर पोलिसांनी घटनेचे गांभीर्य लक्षात घेता कार्यकर्त्यांना पांगविण्यासाठी सौम्य लाठीचार्ज केला.
६७२ मतदारांनी बजावला हक्क
श्री शिवाजी शिक्षण संस्थेच्या निवडणुकीसाठी सकाळी आठ वाजेपासून मतदान प्रक्रिया सुरू झाली. एकूण ७७४ मतदारांपैकी ६७२ आजीवन सदस्य असलेल्या मतदारांनी मतदानाचा हक्क बजावला. निवडणुकीत एकूण ८६.८२ टक्के मतदान झाले. सायंकाळी ७.३० वाजेपासून मतमोजणी सुरुवात झाली आहे. उशिरा निकाल येण्याची शक्यता आहे.
मतदान केंद्रावर दोन गट आमनेसामने होते. त्यांना पोलिसांनी समजावून सांगितले. त्यानंतर सहा जणांना ताब्यात घेतले. यामध्ये दोघे अजारी असल्याने त्यांना सोडण्यात आले.
-आसाराम चोरमले, पोलिस निरीक्षक
हेही वाचलं का
