चंद्रपूर : विदर्भातील ६० जागा राष्ट्रीय समाज पक्षाच्या वतीने लढविल्या जाणार आहेत. आज मंगळवारी राष्ट्रीय समाज पक्षाचे विदर्भ संपर्क प्रमुख संजय कन्नावार यांनी ही माहिती दिली.
राष्ट्रीय समाज पक्ष हा २०१४ पासुन महायुतीचा घटक पक्ष आहे. २०२४ च्या लोकसभा निवडणुकीत राष्ट्रीय समाज पक्षाला महायुतीतून १ जागाला मिळाली. त्यात पक्षाला पराभव पत्करावा लागला. महायुतीने २०१९ च्या निवडणूकीत राष्ट्रीय समाज पक्षाला दौंडची जागा दिली होती. त्याठिकाणी त्या उमेदवाराला पराभवाला सामोरे जावे लागले होते. त्यामुळे २०२४ च्या विधानसभा निवडणुकीत राष्ट्रीय समाज पक्ष स्वबळावर लढणार असून विदर्भातील ६० जागा लढविणार असल्याचे संजय कन्नावार यांनी सांगितले.
राष्ट्रीय समाज पक्षाचे आतापर्यंत ४ आमदार झाले असून ९८ जिल्हा परिषद सदस्य , पंचायत समिती सदस्य तसेच नगरसेवक निवडून आले आहेत. इतकेच नव्हे तर गुजरात मध्ये राष्ट्रीय समाज पक्षाची नगरपालिकेत सत्ता आहे.राष्ट्रीय समाज पक्षाचे राष्ट्रीय अध्यक्ष माजी मंत्री आमदार महादेवराव जानकर यांनी स्वतः नांदेड,बारामती, माढा, परभणी या मतदारसंघांमध्ये लोकसभा निवडणुक लढवली आहे.
या विधानसभा निवडणुकीत राष्ट्रीय समाज पक्षाला महायुतीने विचारात न घेतल्याने २८८ उमेदवार लढविणार असल्याचे पक्षाच्या पार्लमेंट्री बोर्डाने सांगितले आहे. त्यामुळे चंद्रपूर जिल्ह्यातील सहा विधानसभा क्षेत्रात उमेदवार उभे करणार आहे. या निवडणुकीत आजी माजी भाजप काँग्रेस शिवसेना व इतर पक्षाचे पदाधिकारी संपर्कात असल्याचे संजय कन्नावार यांनी सांगितले. या पत्रकार परिषदेत राष्ट्रीय समाज पक्षाचे विदर्भ अध्यक्ष डॉ. तौसीफ शेख, विदर्भ महासचिव संजय कन्नावार, ग्रामीण जिल्हाध्यक्ष आनंदराव अंगलवार,शहर जिल्हाध्यक्ष रमाकांत यादव, मुन्ना मॅकलवार राजु महासाहेब व इतर पदाधिकारी उपस्थित होते.
