चंद्रपूर : नुकत्याच पार पडलेल्या लोकसभा निवडणुकीत पक्षविरोधी कारवाया केल्याच्या आरोपावरून काँग्रेसचे डॉ. विजय देवतळे व डॉ.आसावरी देवतळे यांच्या विरोधात काँग्रेस प्रदेश कार्यालयाने तातडीने निलंबनाची कारवाई केली आहे. त्यांना सहा वर्षासाठी पक्षातून निलंबित करण्यात आले. या कारवाईने काँग्रेसच्या गोटात एकच खळबळ उडाली आहे.
याबाबत मिळालेल्या माहितीनुसार, नुकतीच लोकसभेची निवडणूक पार पडली. यादरम्यान चंद्रपूर आर्णी वणी लोकसभा मतदारसंघामध्ये काँग्रेस कडून प्रतिभा धानोरकर तर भाजप कडून सुधीर मुनगंटीवार उभे होते. याच कार्यकाळात काँग्रेसचे प्रचारादरम्यान डॉ. विजय देवतळे व डॉ.आसावरी देवतळे यांनी पक्ष विरोधी कारवाया केल्याचा ठपका ठेवण्यात आला. या बाबत स्थानिक पातळीवरून प्रदेश कार्यालयाकडे देवतळे दांपत्याच्या विरोधातील पक्ष विरोधी कारवाया केल्याच्या तक्रारी प्राप्त झाल्या होत्या.
या तक्रारीच्या अनुषंगाने लोकसभा निवडणुकीत पक्षविरोधी कारवाया केल्याचा ठपका ठेवून प्रदेश काँग्रेस कार्यालयाच्या वतीने डॉ. विजय देवतळे व डॉ. आसावरी देवतले यांना ६ वर्षाकरिता निलंबित करण्यात आले. विजय देवतळे हे जिल्हा मध्यवर्ती बँकेचे संचालक आहेत. तर आसावरी देवतळे ह्या माजी जिल्हा परिषद सदस्य आहेत. निलंबनाचे कार्यवाही प्रदेशाध्यक्ष नाना पटोले यांच्या निर्देशावरून करण्यात आली आहे. काँग्रेसचे प्रशासन व संघटन उपाध्यक्ष नाना गावंडे यांनी याबाबत कार्यवाहीचे पत्र डॉ. विजय देवतळे व डॉ.आसावरी देवताडे यांना दिले आहे.