चंद्रपूर : चंद्रपूर शहरातील हॉटेल व लॉजेसकडून OYO कंपनीच्या ट्रेडमार्क व लोगोचा बनावट वापर करून व्यवसाय सुरू असल्याची माहिती उघडकीस आल्यानंतर, चंद्रपूर शहर पोलीसांनी मोठी कारवाई करत 15 हॉटेल,लॉजेसविरुद्ध गुन्हा दाखल केला आहे.
दिनांक १८ जुलै २०२५ रोजी OYO कंपनीचे नोडल अधिकारी श्री मनोज माणिक पाटील (अहमदाबाद) यांनी पोलीस स्टेशन चंद्रपूर शहर येथे लेखी तक्रार दाखल करत माहिती दिली की, OYO Hotel & Homes Pvt. Ltd. ही कंपनी भारतातील कंपनी अधिनियम २०१३ नुसार नोंदणीकृत असून, OYO ROOMS हा ट्रेडमार्क ट्रेडमार्क अधिनियम १९९९ अंतर्गत नोंदणीकृत आहे.
तक्रारीनुसार, चंद्रपूर शहरात अनेक हॉटेल/लॉजेस OYO कंपनीशी कोणताही व्यावसायिक करार नसतानाही OYO चा ब्रॅण्ड, लोगो, डिझाईन घटक व दर्शनी लुकचा वापर करून ग्राहकांची फसवणूक करत आहेत. हे OYO च्या बौद्धिक संपदेचे उल्लंघन असून कंपनीच्या प्रतिष्ठेला मोठा धक्का पोहोचवणारे असल्याचे त्यांनी तक्रारीत म्हटले होते.
1. Hotel Royal Inn – Ballarpur Road
2. Hotel Dream Stay – Ashtabhuja
3. Hotel Friends Stay – Ballarpur Road
4. Leo Star Hotel – Ashtabhuja Ward
5. Hotel RR Inn – Babupeth
6. Hotel Sky Line – Ashtabhuja Ward
7. Hotel Ashoka Lodging & Boarding – Babupeth
8. Hotel IK Residency – Vikas Nagar
9. Hotel 3 Star – Babupeth
10. Hotel Celebrity – Babupeth
11. Hotel Green Park – Babupeth
12. Hotel 7 Day – Mahakali Mandir Road
13. Hotel Sunrise – Jatpura Gate
14. Rayan Hotel & Celebration – Vichoda
15. Hotel Flagship Inn – Near Janta College
वरील हॉटेल्सनी OYO ब्रँडचा खोटा वापर केल्याने भारतीय न्याय संहिता २०२३ चे कलम ३४५(३), ३४७(१) आणि ट्रेड मार्क अधिनियम १९९९ चे कलम १०३ व १०४ अंतर्गत गुन्हा दाखल करण्यात आला आहे.
ही कारवाई पोलीस अधीक्षक मुम्मका सुदर्शन, अप्पर पोलीस अधीक्षक श्री ईश्वर कातकडे, तसेच उपविभागीय पोलीस अधिकारी श्री सुधाकर यादव यांच्या मार्गदर्शनाखाली पोलीस निरीक्षक श्री निशीकांत रामटेके (पो.स्टे. चंद्रपूर शहर) यांच्या नेतृत्वात पार पडली. गुन्हा दाखल केल्यानंतर, ७ ते ८ हॉटेल्सवर मध्यरात्रीपर्यंत धाडी टाकून तपासणी व कायदेशीर कारवाई सुरू करण्यात आली आहे. तसेच, शहर पोलीस स्टेशनच्या हद्दीबाहेरील संबंधित लॉजेसवरही तपास सुरू आहे.
पोलीसांनी दिलेल्या माहितीनुसार, या कारवाईचा उद्देश ग्राहकांची फसवणूक रोखणे, OYO कंपनीचे बौद्धिक संपदा हक्क वाचवणे आणि अवैध व्यवसाय पद्धतीवर अंकुश ठेवणे हा आहे. गुन्ह्याचा सखोल तपास सुरू असून, लवकरच आणखी काही हॉटेल्सवर कारवाई होण्याची शक्यता वर्तवली जात आहे.
