Warora Police Harit Rakshak Campaign
चंद्रपूर : पर्यावरण संवर्धन आणि सुरक्षिततेला प्राधान्य देत वरोरा पोलिस ठाण्याच्या परिसरात ‘हरित रक्षक’ या अभिनव उपक्रमाचा शुभारंभ २५ ऑगस्ट रोजी करण्यात आला. जीएमआर वरोरा एनर्जी लिमिटेड आणि रोटरॅक्ट क्लब यांच्या सहकार्याने हा उपक्रम राबविण्यात येत आहे.
जिल्हा पोलीस अधीक्षक आयुष नोपानी यांच्या हस्ते या उपक्रमाचे उद्घाटन करण्यात आले. त्यांच्या वरोरा शहरातील प्रथम आगमनानिमित्त त्यांच्या हस्ते या अभिनव उपक्रमाचा शुभारंभ करण्यात आला.
यावेळी उपविभागीय पोलीस अधिकारी संतोष बाकल आणि वरोरा पोलीस निरीक्षक ओमप्रकाश सोनटक्के प्रमुख अतिथी म्हणून उपस्थित होते. पर्यावरणाचा समतोल राखण्यासाठी वृक्षसंवर्धन आवश्यक असून, त्याच उद्देशाने ‘हरित रक्षक’ या उपक्रमाची सुरुवात करण्यात आली. उद्घाटनप्रसंगी वृक्षारोपण करण्यात आले. पोलिस ठाण्याच्या परिसरात लावण्यात येणाऱ्या झाडांचे संगोपन आणि संवर्धन करण्यावरही विशेष भर देण्यात येणार आहे.
या उपक्रमासाठी जीएमआर वरोरा एनर्जी लिमिटेडच्या वतीने सहकार्य करण्यात आले. जीएमआर वरोरा येथील आरोग्य, पर्यावरण व सुरक्षा विभागाचे सहाय्यक व्यवस्थापक अनुज कुमार तसेच रोटरॅक्ट क्लबचे सदस्य आणि पोलीस कर्मचारी मोठ्या संख्येने उपस्थित होते.
‘हरित रक्षक’ अभियानाच्या माध्यमातून पोलिस ठाण्याचा परिसर अधिक हिरवागार करण्यासोबतच पर्यावरण संरक्षणाचा संदेश नागरिकांपर्यंत पोहोचविण्याचा प्रयत्न करण्यात येत आहे.
