भंडारा: खड्डेमय रस्त्यावरुन वाट काढताना अनियंत्रित झालेली स्कुलव्हॅन रस्त्याच्या कडेला जाऊन उलटली. या अपघातात चालकासह विद्यार्थी जखमी झाले. जखमींना तातडीने जिल्हा सामान्य रुग्णालयात दाखल करण्यात आले. ही घटना भंडारा तालुक्यातील खमारी मार्गावरील सुरेवाडा येथील पुलाजवळ आज दुपारी २ वाजताच्या सुमारास घडली.
अवनेश भोयर (५) रा. माटोरा, सानिध्या चोपकर रा. खमारी, उर्वेश बेदरकर, सानवी बेदरकर, रुद्रानी बेदरकर रा. मांडवी, गर्ग मेश्राम रा. माटोरा या विद्यार्थ्यांसह उमेश मेश्राम (२५) रा. मांडवी या चालकाचा जखमींमध्ये समावेश आहे.
भिलेवाडापासून सुरेवाडा, खमारी आणि पुढे करडीला जाणाऱ्या या मार्गाची अत्यंत दुरावस्था झाली आहे. या रस्त्याचे अनेकदा बांधकाम करण्यात आले. परंतू, दर्जाहिन कामामुळे रस्त्यावर मोठमोठे खड्डे पडले आहे. याच मार्गावरुन रेतीची अवजड वाहतूक मोठ्या प्रमाणात होते. नादुरुस्त रस्त्यामुळे अनेकांचा जीवही गेला आहे.
आज या मार्गावरील गावातील विद्यार्थ्यांना स्कुलव्हॅनमध्ये बसवून चालक उमेश मेश्राम हा निघाला होता. कारधा येथील शाळेतील हे विद्यार्थी आहेत. रस्त्यावर मोठमोठ्या खड्डयांतून वाट काढताना त्याचे व्हॅनवरील नियंत्रण सुटले आणि व्हॅन रस्त्याच्या खाली जाऊन कोसळली. यात चालकासह विद्यार्थी जखमी झाले. रस्त्याने जाणाऱ्या नागरिकांनी तात्काळ धाव घेत मदतकार्याला सुरुवात केली. कारधा पोलिसांचा ताफा घटनास्थळी दाखल झाला. जगद्गुरु रामानंदाचार्य नरेंद्राचार्य मुख्यपीठाच्या रुग्णवाहिकेने जखमींना जिल्हा सामान्य रुग्णालयात दाखल करण्यात आले. अपघातानंतर विद्यार्थी भेदरलेले होते. या रस्त्याची तात्काळ दुरुस्तीची मागणी जोर धरत आहे.
