भंडारा: साकोली शहरातील प्रसिद्ध श्याम हॉस्पिटलमध्ये तपासणीसाठी आलेल्या १७ वर्षीय अल्पवयीन मुलीसोबत डॉक्टरनेच सोनोग्राफीच्या बहाण्याने अश्लिल कृत्य केल्याची धक्कादायक घटना उघडकीस आली आहे. सदर मुलगी आपल्या आईसोबत उपचारासाठी हॉस्पिटलमध्ये आली होती. डॉक्टर देवेश अग्रवाल यांनी आई व नर्सला बाहेर बसवून रुग्ण मुलीसोबत सोनोग्राफी रूममध्ये अश्लिल कृत्य केले, असा गंभीर आरोप आहे. घडलेली घटना पीडितेने आई-वडिलांना सांगितल्यानंतर साकोली पोलिस स्टेशनमध्ये तक्रार दाखल करण्यात आली असून, आरोपी डॉक्टर फरार आहे.
फिर्यादी महिलेने दिलेल्या तक्रारीनुसार, तिची मुलगी फेब्रुवारी २०२५ मध्ये आजारी होती. उपचारासाठी तिला श्याम हॉस्पिटलमध्ये दाखल करण्यात आले होते. यानंतर काही वैद्यकीय त्रास पुन्हा उद्भवल्याने ९ जुलै रोजी सकाळी १० वाजता ती तिला उपचारासाठी डॉक्टर देवेश अग्रवाल यांच्याकडे घेऊन आली. डॉक्टरांनी सोनोग्राफी आवश्यक असल्याचे सांगून आई व नर्सला बाहेर थांबण्यास सांगितले. त्यानंतर सोनोग्राफीच्या नावाखाली डॉक्टरने पीडित मुलीसोबत गैरवर्तन केले, असा आरोप करण्यात आला आहे.
याप्रकरणी पीडित मुलीने रुग्णालयाच्या बाहेर निघाल्यानंतर आईला रडत रडत घडलेल्या घटनेची संपूर्ण माहिती सांगितली. साकोली पोलिसांनी या प्रकरणी तात्काळ गुन्हा दाखल करून डॉक्टर देवेश अग्रवाल रा. साकोली यांच्याविरुद्ध विविध कलमान्वये गुन्हा दाखल केला आहे. आरोपी डॉक्टर अद्याप फरार असून, त्याचा शोध सुरू आहे.
