Loni Car Bike Crash
अमरावती: अमरावती-अकोला मार्गावरील लोणी गावाजवळ भरधाव कारने दुचाकीला जोरदार धडक दिल्याने भीषण अपघात झाला. यात वडिलांचा जागीच मृत्यू झाला, तर आई आणि मुलगा जखमी आहेत. ही घटना गुरुवारी (दि.२१) घडली. मृत व्यक्तीचे नाव मोहम्मद नौशाद कुरेशी (वय ४०, रा. ताजनगर, अमरावती) असे असून जखमींमध्ये त्यांची पत्नी गुलनाज अंजुम मोहम्मद नौशाद (वय ३५) आणि मुलगा मोहम्मद अबदान (वय ८) यांचा समावेश आहे.
मिळालेल्या माहितीनुसार, मोहम्मद नौशाद हे पत्नीसमवेत मुलाला आणण्यासाठी सोनेरी येथील मदरशात गेले होते. तेथून तिघेही दुचाकी एम एच २७ डीएन २०८९ ने अमरावतीकडे परतत असताना लोणी गावाजवळ पाठीमागून येणार्या एमएच-०५-सीएम-३९०० क्रमांकाच्या भरधाव कारने त्यांच्या दुचाकीला जोरदार धडक दिली.
हा अपघात इतका भीषण होता की कारचा पुढील भाग पूर्णपणे चक्काचूर झाला. धडकेनंतर तिघेही रस्त्यावर फेकले गेले. मोहम्मद नौशाद यांच्या डोक्याला गंभीर दुखापत झाल्याने त्यांचा जागीच मृत्यू झाला. तर पत्नी आणि मुलगा जखमी झाले. घटनेची माहिती मिळताच लोणी पोलीस स्टेशन चे पोलीस तातडीने घटनास्थळी दाखल झाले.
जखमींना उपचारासाठी रुग्णालयात दाखल करण्यात आले असून त्यांच्यावर उपचार सुरू आहेत. या प्रकरणी लोणी पोलिसांनी कार चालकाविरुद्ध गुन्हा दाखल करून पुढील तपास सुरू केला आहे.
