अमरावती, पुढारी वृत्तसेवा: जिल्ह्यातील मेळघाटात धारणीवरून आकोटकडे जाणारी खासगी बस पोपटखेडच्या पुढे राजदेव बाबा फाट्यावर दरीत कोसळली. हाय पॉईंट जवळ मंगळवारी (दि.२) हा अपघात झाला. अकोटवरून पुढे ही बस मध्यप्रदेशकडे जाणार होती.
राजदेव बाबा फाट्याजवळ खासगी बस (एमपी ४८ पी ०१०३) च्या चालकाचे वाहनावरील नियंत्रण सुटल्याने ही बस थेट दरीत जाऊन कोसळली. या बसमध्ये जवळपास २५ ते ३० प्रवाशी होते. त्यापैकी १२ प्रवासी जखमी झाले आहेत. बस दरीत कोसळल्यानंतर बसने तीन पलट्या घेतल्या. या घटनेची माहिती मिळताच वनविभाग आणि पोलिसांनी घटनास्थळी धाव घेतली. त्यासोबतच अकोटवरुन बचावपथक आणि रुग्णवाहिका घटनास्थळी रवाना झाले. या पथकाने प्रवाशांना दरीतून काढण्याचे काम केले. अपघातात जखमी झालेल्यांना तातडीने ग्रामीण रुग्णालयात दाखल करण्यात आले आहे.
या अपघातात सर्व लहान मुले सुरक्षित आहेत. तसेच इतरांना सुखरुप दरीतून काढण्यात आले आहे. जखमी झालेल्यांना टेम्ब्रूसोडा आणि अचलपूर उपजिल्हा रुग्णालयात दाखल केले आहे. जखमी प्रवाशांमध्ये निजामुद्दीन अब्दुल (वय ६४, रा. धारणी), सविनाबी (वय ५५, रा. भिकन गाव मध्यप्रदेश), काली तुळशीराम जावरकर (वय ३०), शानू जांभेकर (वय ३२), कालू जांभेकर ( वय ३२), रेणुका जावरकर (वय २९,रा.दहिंद्रा), अनिल कासदेकर (वय ३३,रा.कुसुमकोट) आदींचा समावेश आहे.