अकोला : जिल्ह्यातील पातूर घाट आज पहाटे एका भीषण अपघाताने हादरला. लोखंडी अँगलची वाहतूक करणारा एक ट्रक उतारावर चालकाचे नियंत्रण सुटल्याने उलटला, या दुर्घटनेत चालकासह दोघांचा जागीच मृत्यू झाला तर एक जण गंभीर जखमी झाला आहे. या अपघातामुळे मार्गावरील वाहतूक काही काळ विस्कळीत झाली होती.
मिळालेल्या माहितीनुसार, ट्रक क्रमांक टीएस १५ यूए ११०७ हा लोखंडी अँगल घेऊन जात होता. १३ ऑगस्ट रोजी पहाटेच्या सुमारास पातूर घाटातील तीव्र उतारावरून जात असताना चालकाचे ट्रकवरील नियंत्रण सुटले आणि हा अनियंत्रित ट्रक रस्त्याच्या कडेला उलटला. अपघात इतका भीषण होता की ट्रकचा अक्षरशः चक्काचूर झाला आणि त्यातील लोखंडी अँगल रस्त्यावर विखुरले गेले.
घटनेची माहिती मिळताच पातूर पोलीस तात्काळ घटनास्थळी दाखल झाले. या अपघातामुळे घाटातील वाहतूक काही काळासाठी पूर्णपणे विस्कळीत झाली होती, ज्यामुळे वाहनांच्या लांबच लांब रांगा लागल्या होत्या. पोलिसांनी तातडीने मदतकार्य सुरू करून वाहतूक सुरळीत केली.
या प्रकरणी पोलीस हेड कॉन्स्टेबल वासिमोद्दीन यांच्या फिर्यादीवरून पातूर पोलीस ठाण्यात गुन्हा दाखल करण्यात आला असून, पोलीस पुढील तपास करत आहेत. या अपघातामुळे पातूर घाटातील रस्त्यांच्या सुरक्षिततेचा प्रश्न पुन्हा एकदा ऐरणीवर आला आहे.
