Body of Man Swept Away in Kumbhi River Found After 4 Days of Search
कोल्हापूर : कुंभी नदीच्या पात्रात वाहून गेलेल्या जनार्दन शिंदे यांचा मृतदेह आज (दि.१२) सकाळी तांदुळवाडी (ता. पन्हाळा) येथील नदीपात्रात आढळून आला. गेल्या चार दिवसांपासून कोल्हापूर जिल्हा आपत्ती व्यवस्थापन, कळे पोलीस प्रशासन आणि 'व्हाईट आर्मी'च्या जवानांकडून शिंदे यांचा शोध घेण्यासाठी युद्धपातळीवर मोहीम राबवण्यात येत होती.
अशी होती घटना
जोरदार पावसामुळे कुंभी नदीला पूर आला होता. वेतवडे धरणाजवळून जनार्दन शिंदे हे वाहून गेले होते. पाण्याच्या प्रवाहाचा वेग प्रचंड असल्यामुळे शोध मोहिमेत वारंवार अडथळे येत होते. अखेर चौथ्या दिवशी ही मोहीम यशस्वी झाली असून, त्यांचा मृतदेह लोंघे (ता. गगनबावडा) हद्दीत तांदुळवाडी परिसरातील नदीपात्रात सापडला.
शोध मोहिमेत सहभाग
व्हाईट आर्मीचे प्रमुख अशोक रोकडे यांच्या मार्गदर्शनाखाली सचिन भोसले, शैलेश रावण, श्रीकांत पाटील आणि शंकर केंगारे यांच्या पथकाने अथक प्रयत्न करून मृतदेह शोधून काढला. घटनास्थळी कळे पोलीस ठाण्याचे सहाय्यक पोलीस निरीक्षक भारत साळुंखे यांनी भेट देऊन पाहणी केली आणि मृतदेहाचा पंचनामा केला.
