Akola Bullock Death Flood
अकोला : बाळापूर तालुक्यातील मोरगाव सादीजन येथील नाल्याला अचानक आलेल्या पुरात वाहून गेल्याने शेतकऱ्यांचा एक बैल मृत्युमुखी पडल्याची घटना शनिवारी घडली. त्यामुळे शेतकऱ्यांचे 65 हजार रुपयांचे नुकसान झाल्याची माहिती आहे.
प्राप्त माहिती नुसार , शनिवारी दुपारी मोरगाव सादीजन अडोसी, कडोशी, निमकरदा टाकळी या परिसरात मोठ्या प्रमाणात पाऊस झाला. त्यामुळे संपूर्ण परिसरातील नाल्यांना मोठा पूर आला. संध्याकाळी साडेचार पाच वाजता च्या दरम्यान मोरगाव सादीजन येथील शेतकरी सुरेश रामभाऊ अहिर हे त्यांच्या बैलबंडीने नाल्यातून असलेल्या रस्त्यातून घरी येत होते.
त्यावेळी त्यांच्या बैलबंडीत त्याचा मुलगा, पत्नी , तसेच एक महिला शेतमजूर बसलेली होती. हे सर्व घरी येत असताना अचानक नाल्याला मोठा पूर आला. यावेळी बैलबंडीला जुंपलेला एक बैल सोडला परंतु दुसरा बैल व बैलबंडी पुराच्या पाण्यात वाहून गेली. बैलबंडीतील सर्व सुखरूप असले तरी दोन मोबाईल फोन, पाच कपाशीच्या बियाण्याच्या पॅकेट पुराच्या पाण्यात वाहून गेले अशी माहिती सूत्रांनी दिली.
