भंडारा: पुढारी वृत्तसेवा; लोकसभा निवडणुकीकरीता भाजपने जाहीर केलेल्या पहिल्या यादीपाठोपाठ दुसऱ्या यादीतही भंडारा-गोंदिया लोकसभा मतदारांघांचा समावेश करण्यात आला नाही. विद्यमान खासदार भाजपचे असताना या मतदारसंघाचा समावेश नसल्याने विद्यमान खासदारांसह भाजपमध्ये संभ्रमाचे वातावरण आहे. भाजप आपला उमेदवार जोपर्यंत जाहीर करीत नाही, तोपर्यंत 'वेट अॅन्ड वॉच'ची भूमिका कॉंग्रेसने घेतली आहे. तर या मतदारसंघावर पूर्वीपासूनच दावा केलेल्या राष्ट्रवादी कॉंग्रेसच्या (अजित पवार) भूमिकेकडे सर्वांचे लक्ष लागून आहे. (Lok Sabha Election)
भाजपच्या पहिल्या यादीत भंडारा लोकसभा मतदारसंघ डावलण्यात आल्यानंतर दुसऱ्या यादीत हमखास समावेश असेल, असा कयास होता. परंतु, दुसऱ्या यादीतही समावेश नसल्याने सर्वांचाच हिरमोड झाला. युतीच्या जागावाटपाबाबत काही मतदारसंघासह भंडारा लोकसभा मतदारसंघासाठी अद्याप एकमत झाले नसल्याने भाजपकडून उमेदवारीची घोषणा केली नसल्याचे बोलले जात आहे. यासोबतच विद्यमान खासदारांसह भाजपमधील अनेकांनी वरिष्ठांकडे उमेदवारीची मागणी केली असल्याने सक्षम उमेदवाराची चाचपणी केली जात आहे. भाजपकडून विद्यमान खासदार सुनील मेंढे, माजी पालकमंत्री डॉ. परिणय फुके, विजय शिवणकर, डॉ. ब्रम्हानंद करंजेकर, आ. विजय रहांगडाले यांची नावे चर्चेत आहेत. (Lok Sabha Election)
भाजपने उमेदवार घोषित केल्यानंतर त्यांच्या तोडीस तोड असा उमेदवार देण्याची तयारी कॉंग्रेसने केली आहे. कॉंग्रेसकडून प्रदेशाध्यक्ष नाना पटोले, कॉंग्रेस जिल्हाध्यक्ष मोहन पंचभाई, डॉ. प्रशांत पडोळे, डॉ. चंद्रशेखर बावनकुळे यांच्या नावाची चर्चा आहे. याशिवाय एका बिगर कॉंग्रेसी उमेदवाराच्याही नावाची चर्चा आहे. सध्यातरी कॉंग्रेस 'वेट अॅन्ड वॉच'च्या भूमिकेत आहे. (Lok Sabha Election)
आघाडीमध्ये भंडारा-गोंदिया लोकसभा मतदारसंघावर आधीपासूनच राष्ट्रवादी कॉंग्रेसचा दावा आहे. आता भाजप आणि राष्ट्रवादी कॉंग्रेसची युती झाल्यानंतर भाजपकडे हा मतदारसंघ येईल, अशी शक्यता होती. परंतु, अलीकडेच राष्ट्रवादी कॉंग्रेसचे नेते खा. प्रफुल पटेल यांनी या मतदारसंघावर आपला दावा सोडला नसल्याचे जाहिर केल्याने भाजपमध्ये संभ्रमाचे वातावरण आहे. तर राष्ट्रवादी कॉंग्रेसमध्ये उत्स्कुतेचे वातावरण आहे. खा. प्रफुल पटेल आपल्या दाव्यावर ठाम राहिले तर भाजपची डोकेदूखी वाढणार आहे. हा मतदारसंघ राष्ट्रवादीकडे आल्यास खुद्द खा. प्रफुल पटेल यांच्यासह जिल्हाध्यक्ष नाना पंचबुद्धे, जिल्हा बँकेचे अध्यक्ष सुनील फुंडे यांच्या नावाची चर्चा आहे.
तथापि, भंडारा-गोंदिया लोकसभा मतदारसंघात युतीचा उमेदवार देताना खा. प्रफुल पटेल यांची भूमिका महत्वाची असणार आहे. येत्या दोनचार दिवसात संपूर्ण चित्र स्पष्ट होणार आहे.
