चंद्रपूर ; पुढारी वृत्तसेवा : अवघ्या दहा दिवसांच्या पट्टेदार वाघाच्या बछड्याला ठार मारल्याची घटना समोर आली आहे. जंगलातून पकडून त्याला क्रुरतेने ठार केल्याचा प्रकार उघडकीस आला आहे. मारेकऱ्यांनी त्या बछड्याचा सांगाडा वाळवून त्याचे जतन केले. वाळलेला सांगाडा आणि अवयवांसह त्याची विक्री करण्याचा प्रयत्न करणाऱ्या दोन आरोपींना गुप्त माहितीच्या आधारे अटक करण्यात आली आहे. आरोपी लोमेश नानाजी डबले रा. चिचबोड़ी ता. सावली, कालिदास मारोती रायपुरे रा. मसाळ ता. चंद्रपूर अशी आरोपींची नावे आहेत. वाघाच्या बछड्याला ठार मारले या वृत्ताने वन्यप्रेमींतून नाराजी आणि संताप व्यक्त करण्यात येत आहे.
या विषयी अधिक माहिती अशी की, आरोपी लोमेश नानाजी डबले, कालिदास मारोती रायपुरे यांनी पाच महिन्यापूर्वी मे 2021 च्या सुमारास सावली तालुक्यातील चिचबोडी जंगलातुन पट्टेदार वाघाच्या अवघ्या १० दिवसाच्या नवजात बछड्याला पकडले. त्यानंतर त्याला क्रुरतेने ठार करून त्याच्या संपूर्ण शरीराचे जतन केले आहे. त्यानंतर या बछड्याच्या सांगाडा आणि त्याचे अवयव विक्री करण्याचा आरोपींचा बेत आखला.
याबाबतची माहिती गुप्तहेरांकडून वनविभागास मिळताच त्यांनी आरोपींना जेरबंद करण्यासाठी योजना आखली. मागील १० दिवसापासून नागपूर – चंद्रपुर – पडोली – अर्जानगर मार्गावर वनविभागाचे पथक कार्यरत होते. सोमवारी 6 ऑक्टोबर 2021 रोजी एम. आय. डी. सी. बुटीबोरी येथे बछड्याच्या अवयवांचा विक्री व्यवहार करणार असल्याची माहिती प्राप्त झाली.
त्यानुसार सापळा रचण्यात आला. मात्र आरोपी कालिदास रायपुरे यांनी मौजा पडोली जिल्हा चंद्रपुर येथे व्यवहार करणार असल्याचे सांगितले, त्यानुसार अरुण गादेवार वनक्षेत्रपाल ( दक्षता पथक ) चंद्रपुर यांच्याशी संपर्क साधुन त्यांना पथकात शामिल करुण वाघ बछडा सांगाड्यासह दोन्ही आरोपींना रंगेहात ताब्यात घेण्यात आले. या आधीही अशाप्रकारे वन्य प्राण्यांच्या अवयवांची तस्करी प्रकरणात या आरोपींचे काही धागे-दोरे आहेत का? याबाबतचा तपास सुरु आहे.
या धाडीत डॉ. भरत सिंग हाडा, उपवनसंरक्षक नागपुर व अरविंद मुंडे, उपवनसंरक्षक चंद्रपुर वनविभाग चंद्रपुर यांचे मार्गदर्शनात, एन. जी. चांदेवार, सहायक वनसंरक्षक जंकास-2, एल. व्ही. ठोकळ, वनपरिक्षेत्र अधिकारी बुटीबोरी, अरुण गादेवार, वनपरिक्षेत्र अधिकारी (दक्षता पथक ) चंद्रपुर, टवले, शेंडे, जाधव, कुल्लरकर वनरक्षक यांनी धाड यशस्वी केली. पुढील तपास एन. जी. चांदेवार सहायक वनसंरक्षक जंकास-2, उपविभाग उमरेड हे करित आहेत.
