नागपूर; पुढारी वृत्तसेवा : क्राईम पेट्रोल मालिकेतील कथा बघून नागपुरात एका इसमाने स्वतःच्याच लुटीचा बनाव केला. आणि मालकाने दिलेले २० लाख रूपये हडप करण्याचा डाव रचला. मात्र पोलिसांनी पोलिसी खाक्या दाखवताच त्याने गुन्ह्याची कबुली दिली.
कर्ज फेडण्यासाठी नोकराने २० लाखांच्या लुटीचा बनाव करून काही रक्कम मोपेडच्या हेडलाइटमध्ये लपविल्याची माहिती समोर आली आहे. चिखली उड्डाणपुलावरील लुटीचा पर्दाफाश करून गुन्हे शाखा पोलिसांनी याप्रकरणी फिर्यादी सिद्धार्थ पुरुषोत्तम रामटेके (वय २७, रा. जुनी मंगळवारी) यालाच अटक केली आहे.
याबाबत अधिक माहिती अशी, सिद्धार्थ हा मिरची व्यापारी मोहन सहजवानी यांच्याकडे काम करतो. तो मालकाचा विश्वासू असल्याने आर्थिक व्यवहारही सांभाळतो. 'क्राईम पेट्रोल' मालिका बघून त्याने मालकाची रक्कम हडपण्याचा कट रचला . बुधवारी दुपारी त्याला मालकाने दिलेले २० लाख रुपये दिले. ही रक्कम जरीपटक्यातील वाहतूकदाराला देण्यास सांगितले होते. दरम्यान त्याने ही रक्कम चिखली उड्डाणपुलावर चोरट्यांनी लुटल्याची माहिती मालकाला दिली. त्यानंतर यशोधरानगर पोलिसांत मालकासोबत जाऊन स्वतः तक्रार दिली. त्यानंतर पोलिसांनी जबरी चोरीचा गुन्हा दाखल केला.
गुन्हे शाखा पोलिसांनी हायटेक तपासाला सुरुवात केली. पोलिसांना तपासात सिद्धार्थवर संशय आला. पोलिसांनी त्याला ताब्यात घेऊन कसून चौकशी केली असता त्याने स्वत: लुटीचा बनाव केल्याचे मान्य केले. २०१८ मध्ये सिद्धार्थने इलेक्ट्रिकचे दुकान थाटण्यासाठी साडेचार लाख रुपयांचे कर्ज घेतले होते. या व्यवसायत त्याला नुकसान झाले. कर्ज फेडण्यासाठी त्याने लुटीचा बनाव आखल्याचेही पोलिसांच्या तपासात समोर आले.
२० लाखांपैकी काही रक्कम रमणा मारोती परिसरातील दुकानात तर उर्वरित मोपेडच्या हेडलाइटमध्ये लपविल्याचे त्याने सांगितले. गुन्हे शाखा पोलिसांनी ही रक्कम जप्त करीत त्याला यशोधरानगर पोलिसांच्या स्वाधीन केले.
हेही वाचलंत का ?
