यवतमाळ, पुढारी वृत्तसेवा : मुलाला सोबत घेऊन कपडे धुण्यासाठी गेलेल्या आईचा मुलासह बुडून मृत्यू झाला. येथील धामणगाव मार्गावरील करळगाव शिवारात गिट्टी खदानीच्या डबक्यात ही हृदयद्रावक घटना सोमवारी सायंकाळी घडली. मंगळवारी सकाळी दोघांचा मृतदेह हाती लागला. रुपाली शिवाजी शिंदे (वय ३५), अजिंक्य उर्फ भोला शिवाजी शिंदे (वय १४) रा. इस्लामपूर जि. नांदेड ह.मु. करळगाव शेतशिवार असे मृताची नावे आहेत.
अधिक माहिती अशी की, सहा महिन्यापूर्वी नांदेड जिल्ह्यातून शिंदे जोडपे करळगाव शिवारातील एका शेतावर कामासाठी आले होते. रुपाली शिंदे ही रोज कपडे धुण्यासाठी शेतालगत असलेल्या खदानीच्या डबक्यावर जात होती. सोमवारी सायंकाळी मुलगा अजिंक्य याच्यासोबत डबक्यावर कपडे धुण्यासाठी गेली. मुलगा आंघोळीसाठी पाण्यात उतरला. पाण्याचा अंदाज न आल्याने तो डबक्यात बुडू लागला. त्याला वाचविण्यासाठी रुपाली पुढे गेली. तीही पाण्यात बुडाली. यावेळी शिवाजी शिंदे हे शेतात काम करीत होते. सायंकाळी उशीर झाला तरी पत्नी घरी आली नाही म्हणून त्याने शोध घेतला. परिसरात असलेल्या शेतातील गोठ्यावर चौकशी केली. तेथे त्यांना पत्नी दिसली नाही. अखेर शिवाजीने खदानीतील खड्याकडे धाव घेतली. त्यात ठिकाणी काठावर कपडे पडलेले दिसल्याने त्याला संशय आला, त्याने तत्काळ मदत बोलाविली. सायंकाळी रुपालीचा मृतदेह डबक्याबाहेर काढला. मात्र रात्र झाल्याने अजिंक्यचा मृतदेह काढता आला नाही. मंगळवारी सकाळी यवतमाळ ग्रामीणचे ठाणेदार किशोर जुनघरे, जमादार नितीन कोवे घटनास्थळी पोहोचले. त्यांनी ग्रामस्थांच्या मदतीने अजिंक्यचा मृतदेह बाहेर काढला. या प्रकरणी यवतमाळ ग्रामीण पोलिसांनी अकस्मात मृत्यूची नोंद घेतली आहे.
नांदेड जिल्ह्यातून शेतावर कामासाठी आलेल्या शिंदे कुटुंबातील लहान मुलीचा दोन वर्षापूर्वीच पाण्यात बुडून मृत्यू झाला होता. आता त्यानंतर रुपाली व अजिंक्य या मायलेकाचाही मृत्यू झाल्याने शिवाजी यांच्यावर दुःखाचा डोंगर कोसळला आहे.
