ठाणे : पुढारी ऑनलाइन डेस्क - ठाणे पोलीस आयुक्त आशुतोष डुंबरे, डॉ. ज्ञानेश्वर चव्हाण यांच्यासह वरिष्ठ पोलिस अधिकाऱ्यांच्या पोलीस पथकाने विजयादशमीच्या शुभ मुहूर्तावर ठाणे पोलिस कवायत मैदान येथे पारंपरिक पद्धतीने शस्त्रपूजन केले.
शारदीय नवरात्रीच्या नऊ दिवसानंतर अश्विन महिन्याती शुक्ल पक्षाच्या दशमी तिथीला दसरा अर्थात विजयादशमी साजरी केली जाते. यादिवशी प्रभू श्रीरामाने रावणाचा वध केला असल्याने या घटनेनंतर दरवर्षी दसऱ्याला रावणाच्या पुतळ्याचे दहन केले जाते. हा वाईट प्रवृत्तींवर चांगल्या प्रवृत्तीने मिळवलेला विजय समजला जातो. यासोबतच शस्त्रपूजन केली जाते. त्याप्रमाणे ठाणे पोलीस आयुक्तालयात पारंपरिक रीतीने शस्त्रपूजन करण्यात आली.
यामध्ये पूजा विधीवत शस्त्रांच्या प्रदर्शनात दारूगोळा सजवून सर्व शस्त्रांची पूजा करण्यात आली. याप्रसंगी वरिष्ठ पोलीस अधिकाऱ्यांच्या पथकासह शनिवारी (दि.12) दसऱ्याच्या दिवशी ठाणे ग्रामीण पोलिस अधीक्षक एसपी स्वामी यांसह ठाणे ग्रामीण मुख्यालयात पूजा विधी प्रदर्शनात दारुगोळा सजवून शस्त्र पूजा करण्यात आली.
पुराणकथांनुसार, प्राचीन काळी महिषासूर नावाचा राक्षस होता. ज्याने देवतांना पराभूत केले होते. ज्याच्यामुळे सर्वच देव चिंतेत पडले होते. तेव्हा ब्रह्मा, विष्णू आणि महेश यांनी आपल्या शक्तींपासून एक अनोखी शक्ती निर्माण केली. ज्या शक्तिचे नाव दुर्गा होते. देवतांनी आपल्याजवळील शस्त्र या शक्तिला देऊन तिला अधिकच शक्तिशाली बनवले. देवीने या सर्व शस्त्रअस्त्रांचा वापर करुन महिषासूराचा वध केला. या दिवसापासूनच अश्विन महिन्यातील दशमीला शस्त्रपूजन करण्यात येत आहे. अर्थात वाईट शक्तिवर चांगल्याचा विजय असल्याचे हे प्रतिक मानले जाते.
