ठाणे : 23 जानेवारी रोजी पहाटे दिवा येथून 6 कोटी 94 लाख रुपये किमतीच्या 1 किलो 736 ग्रॅम हेरॉईन ड्रग्जसह एका आरोपीस ठाणे अमली पदार्थ विरोधी पथकाने अटक केली होती. तलत वजाहत रसूल सय्यद (47) असे अटक करण्यात आलेल्या आरोपीचे नाव होते. दरम्यान, याच गुन्ह्यात मोहम्मद खान अहमद खान महाडिक (67) या आणखी एका आरोपीस कुर्ला येथून अटक करण्यात आली आहे.
या प्रकरणात ड्रग्ज तस्करीच्या साखळीचे इंटरनॅशनल कनेक्शन उघड झाल्याची माहिती पोलिसांनी दिली. शीळ फाट्याकडून दिव्याकडे जाणाऱ्या रोडवर एक जण हेरॉईन विक्रीसाठी येणार असल्याची माहिती ठाणे अमली पदार्थ विरोधी पथकाचे पोलीस हवालदार अमोल देसाई यांना 23 जानेवारी रोजी मिळाली होती.
त्यानुसार पहाटे 3च्या सुमारास पोलीस पथकाने सापळा रचून एका ड्रग्ज विक्रेत्यास अटक केली होती. त्याच्याकडून 1 किलो 736 ग्रॅम वजनाचा हेरॉईनसह रोख 1 हजार रुपये तसेच 10 हजारांचा मोबाईल असा एकूण 6 कोटी 94 लाख 51 हजार रुपयांचा मुद्देमाल जप्त केला होता.
