डोंबिवली : एकीकडे बेरोजगारीचा प्रश्न ऐरणीवर आला आहे. शिक्षण घेऊनही नोकऱ्या मिळत नाहीत. नोकरी मिळाली तरी विनाशकाले विपरीत बुद्धी सुचते, असा प्रकार कल्याणमध्ये राहणाऱ्या दुचाकीस्वाराच्या हातून घडला आहे.
कल्याण पश्चिमेत सिंडिकेट भागात एका 25 वर्षीय तरुणीने जिममध्ये जाण्यासाठी भाड्याच्या दुचाकीची नोंदणी केली. काही वेळात भाड्याचा दुचाकीस्वार तरुणीला घेण्यासाठी या तरुणीजवळ पोहोचला. या तरुणी विश्वास ठेवून दुचाकीस्वाराच्या मागे बसली. प्रवासादरम्यान दुचाकीस्वाराने जिमच्या रस्त्याने न जाता पोलीस वसाहतीमधील अंधाऱ्या भागात तरुणीला नेले. तेथे तिच्यावर अतिप्रसंग करण्याचा प्रयत्न केला. आरडाओरडा केल्यास ॲसिड फेकून चेहरा विद्रूप करीन, अशी या दुचाकीस्वाराने तरुणीला धमकी दिली. मात्र या रणरागिणीने आकांडतांडव करून दुचाकीस्वाराशी दोन हात केले. हे पाहून मदतीसाठी धाऊन आलेल्या परिसरातील रहिवाशांनी या बदमाशाची यथेच्छ धुलाई करून त्याला पोलिसांच्या हवाली केले.
सिद्धेश परदेशी (19) असे अटक करण्यात आलेल्या दुचाकीस्वाराचे नावे आहे. पिडीत तरुणीने दिलेल्या फिर्यादीनुसार महात्मा फुले चौक पोलिसांनी गुन्हा दाखल केला आहे. पोलिसांनी त्याच्या ताब्यातील दुचाकीसह चाकू आणि स्प्रे बॉटल हस्तगत केली आहे.
या संदर्भात पोलीस सूत्रांकडून मिळालेल्या माहितीनुसार, शनिवारी सायंकाळी सात वाजण्याच्या सुमारास कल्याण पश्चिमेकडील सिंडिकेट परिसरात राहणारी तरुणी रिक्षाऐवजी ती भाड्याची रॅपिडो, ओला, उबेर दुचाकीची नोंदणी करून प्रवास करते. नेहमीप्रमाणे कल्याण रेल्वे स्थानक परिसरात असलेल्या जिममध्ये जाण्यास निघाली होती. या तरुणीने उबेरची दुचाकी नोंदणी केली. थोड्या वेळाने रॅपिडोचा दुचाकीस्वार तिथे आला. त्याने या तरुणीला तिच्या घराजवळून दुचाकीवर बसविले. परंतु त्याने ओटीपी त्याच्या मोबाईलमध्ये घेतला नसल्याने तरुणीच्या मोबाईलवर मेसेज आला नाही. म्हणून त्याला या तरुणीने हॉस्पीटल समोर थांबवून ओटीपी मोबाईलमध्ये टाकावयास लावला.
त्यानंतर त्याने दुचाकी सिंडीगेट चौकाकडे जात असताना अचानक त्याने दुचाकी भरधाव वेगात आईस फॅक्टरी समोरील पडक्या इमारतीच्या अंधाराकडे वळवली. त्याची ही हरकत पाहून तरुणीला संशय आला. तिने दुचाकीवरून खाली उडी मारली. यात तिच्या डावे पायास जखम झाली. तरीही तरुणाने तरुणीच्या हाताला खेचून नेत अतिप्रसंग करण्याचा प्रयत्न केला. तरुणीने त्याला कडाडून विरोध केला मात्र त्याने खिशातून स्प्रे काढत हे ॲसिड आहे, ओरडलीस तर तोंडावर टाकीन, असे धमकावून खिशातून हिरवी मूठ असलेला स्टीलचा धारदार चाकू काढला. चाकूचा धाक दाखवून तिच्या गळ्यातील सोन्याची व मोत्याची माळ खेचली. या झटापटीत मोत्याची माळ तुटली. तरीही त्याने तरुणीजवळील एक हजार रुपये जबरीने खेचून काढून घेतले.
