भिवंडी : जिल्हाधिकारी श्रीकृष्ण पांचाळ,अप्पर जिल्हाधिकारी हरिश्चंद्र पाटील तथा उपविभागीय अधिकारी अमित सानप यांच्या मार्गदर्शना खाली भिवंडी तहसीलदार अभिजीत खोले यांच्या आदेशाने मौजे केवणी व काल्हेर येथील राखीव वन व गुरुचरण क्षेत्रामध्ये सुरू असलेल्या अवैध रेती साठवणूक व रेती माफियांच्या बेकायदेशीर कारवायां विरुद्ध महसूल विभागाने गुरुवारी मोठी संयुक्त धडक कारवाई केली.
मंडळ अधिकारी खारबाव सुधाकर कामडी,मंडळ अधिकारी भिवंडी शैलेश भोजने,मंडळ अधिकारी आनगाव गणेश विशे,मंडळ अधिकारी राहूर रविंद्र काळे यांच्या नेतृत्वाखालील सर्व ग्राम महसूल अधिकारी, कांदळवन संधारण घटक ठाणे,वन विभागाचे अधिकारी व कर्मचारी,भिवंडी ग्रामीण व नारपोली पोलीस ठाण्याचे अधिकारी व कर्मचारी, पंचायत समिती भिवंडीचे अधिकारी तसेच संबंधित ग्रामपंचायतींचे अधिकारी व कर्मचारी यांनी सक्रिय सहभाग घेऊन ही कारवाई करण्यात आली.
या कारवाईमध्ये खाडीमधून अनधिकृतरित्या उपसा करून आणण्यात येणारी रेती साठविण्या साठी तयार करण्यात आलेल्या कुंड्यांवर जेसीबी यंत्रांच्या सहाय्याने उध्वस्त करण्यात आल्या. यामध्ये मौजे केवणी येथील सर्वे नं. 181/अ, क्षेत्र 22.33.39 हेक्टर आर चौरस मीटर, भोगवटादार गुरुचरण ग्रुप ग्रामपंचायत केवणी-दिवे,येथील 15 कुंड्या व सर्वे नं. 181/ब, क्षेत्र 08.03.61 हेक्टर आर चौरस मीटर, भोगवटादार राखीव वने तसेच मौजे काल्हेर येथील सर्वे नं. 114, क्षेत्र 03.32.85 हेक्टर आर चौरस मीटर, भोगवटादार राखीव वने या क्षेत्रांमध्ये उभारण्यात 8 कुंड्या अशा एकूण 23 अवैध रेती साठवणूक कुंड्यांचा समावेश होता.
ही अवैध रेती साठवणूक कुंड्या जमीनदोस्त करण्यात आल्या. या कुंड्यांमध्ये खाडीमधून चोरी केलेली रेती मोठ्या प्रमाणात साठवून ठेवण्यात येत असल्याचे महसूल विभागाच्या पाहणीत निदर्शनास आले.
