नालासोपारा : नवापूर बीच येथे दोन अल्पवयीन मुलांचा समुद्रात बुडून मृत्यू झाल्याची घटना घडली आहे. ही दोन मुले फुटबॉल खेळण्यासाठी गेली होती. या दरम्यान दोन्ही मुलांचा समुद्रात बुडून मृत्यू झाल्याची दुर्दैवी घटना घडली. या प्रकरणी अर्नाळा सागरी पोलीस ठाण्यात आकस्मिक मृत्यूची नोंद करण्यात आली आहे.
पोलिसांनी दिलेल्या माहितीनुसार, 19 मार्च रोजी सायंकाळी 6 वाजण्याच्या सुमारास ही घटना घडली. मंथन रविंद्र धोत्रे (16) व त्याचा मित्र श्लोक चिंदरकर (16) हे आपल्या इतर मित्रांसोबत नवापूर बीचवर फुटबॉल खेळण्यासाठी गेले होते. दरम्यान खेळताना दोघेही समुद्राच्या पाण्यात गेले असता, पाण्याचा अंदाज न आल्याने ते दोघे बुडाले.
या घटनेनंतर परिसरात एकच खळबळ उडाली. स्थानिकांच्या मदतीने शोध घेण्यात आला, मात्र दोघांचाही दुर्दैवी मृत्यू झाला. या प्रकरणी अर्नाळा सागरी पोलीस ठाण्यात आकस्मिक मृत्यूची नोंद करण्यात आली असून, पुढील तपास सुरू आहे.
