Murbad Ashram School: मुरबाड आश्रमशाळा विद्यार्थिनी जीव संपवण्याप्रकरणी प्रकल्प अधिकारी निलंबित
मुरबाड : मुरबाड तालुक्यातील आश्रम-शाळेतील दहावीच्या विद्यार्थिनीच्या आत्महत्येप्रकरणी मुख्याध्यापक व स्त्री अधीक्षिकेला निलंबित केले तरी प्रकल्प अधिकाऱ्यांना तत्काळ निलंबित करण्याची मागणी आ. संजय केळकर यांनी विधानसभेत केली. त्यानंतर आदिवासी विकास मंत्री अशोक उईके यांच्या निर्देशानंतर शहापूर आदिवासी प्रकल्प अधिकाऱ्याला तत्काळ निलंबित करण्यात आले.
येथील आश्रमशाळेतील एका दहावीच्या विद्यार्थिनीने वसतिगृहात गळफास घेऊन आत्महत्या केल्याचे प्रकरण गेल्यावर्षी 25 डिसेंबरला घडले होते. या प्रकरणी आ. संजय केळकर यांनी अधिवेशनात आवाज उठवून संबंधितांवर कडक कारवाईची मागणी केली होती.
आश्रमशाळेतील घटनेप्रकरणी जबाबदार अधिकारी असलेले प्रकल्प अधिकारी यांच्यावर कारवाईच झालेली नसून तेच इतरांचे निलंबन करत असल्यामुळे तातडीने प्रकल्प अधिकाऱ्याला निलंबित करण्याची जोरदार मागणी आ. संजय केळकर यांनी अधिवेशनात केली. त्याचबरोबर पीडित कुटुंबाला आर्थिक मदत करण्याचीही त्यांनी मागणी केली. यावर उत्तर देताना मंत्री अशोक उईके यांनी अशी प्रकरणे आश्रमशाळांमध्ये वारंवार होत असल्याचे मान्य केले. या प्रकरणी विविध उपाययोजना करण्यात येत आहेत.
आश्रमशाळेतील विद्यार्थिनीच्या आत्महत्येप्रकरणी 25 डिसेंबरला चौकशी समिती गठित करण्यात आली तर 26 डिसेंबरला अहवाल प्राप्त होऊन आश्रमशाळा मुख्याध्यापक आणि स्त्री अधीक्षिका यांना निलंबित करण्यात आले. तसेच पीडित कुटुंबाला दोन लक्ष रुपये सानुग्रह अनुदान देण्यात आल्याची माहिती उईके यांनी दिली.
यावर केळकर यांनी आक्रमक भूमिका घेत प्रकल्प अधिकाऱ्याला निलंबित करण्यात येणार आहे की नाही, असा प्रश्न उपस्थित केला.
अखेर मंत्री उईके यांनी निर्देश दिल्यानंतर अखेर प्रकल्प अधिकाऱ्यांना निलंबित करण्यात आले.
