ठाणे : येत्या मंगळवारी 3 मार्च रोजी ग्रहणातच चंद्र उगवताना साध्या डोळ्यांनी पाहता येणार असल्याची माहिती खगोल अभ्यासक, पंचांगकर्ते दा. कृ. सोमण यांनी दिली. चंद्रग्रहण हा एक नैसर्गिक अविष्कार आहे, तो सर्वांनी साध्या डोळ्यांनी पहायला पाहिजे.
जेव्हा चंद्रबिंब पृथ्वीच्या दाट छायेत येते तेव्हा चंद्रबिंब काळसर-लालसर रंगाचे दिसते. पृथ्वीच्या ज्या भागात चंद्र दृश्य आकाशात असतो तेथून ते चंद्रग्रहण दिसते. 3 मार्च रोजी दुपारी 3.20 वाजता चंद्रग्रहणास प्रारंभ होईल. परंतु त्यावेळी चंद्र आपल्या दृश्य आकाशात असणार नाही.
तो पूर्व क्षितिजाखाली असेल. वेगवेगळ्या ठिकाणांहून वेगवेगळ्या वेळी ग्रहणात चंद्र उगवताना दिसणार आहे. ग्रहण वेधकाळात धूलिवंदन करता येते.
होळीचा रंगांचा सण साजरा करता येणार आहे. समाज माध्यमातून या चंद्रग्रहणाविषयी भीती दाखविली जात आहे, ती योग्य नाही. हे विज्ञानयुग आहे. शिक्षक-पालकांनी मुलांना चंद्रग्रहण दाखवून त्याविषयी माहिती द्यावी, असे आवाहनही सोमण यांनी केले.
