डोंबिवली : गेल्या दीड वर्षांपासून सुरू झालेला कल्याणमधील मराठी आणि परप्रांतीय हिंदी भाषक विषयाचा वाद काही संपण्याचे नाव घेताना दिसत नाही. कल्याणमधील पटेल आर मार्टमधील परप्रांतीय असलेल्या एका सेल्समन तरूणीने ज्येष्ठ सामाजिक कार्यकर्ते श्रीनिवास घाणेकर यांना हिंदी भाषेतून उत्तरे दिली. त्यावेळी तुम्हाला मराठी येत नाही का ? असा सवाल घाणेकर यांनी करताच, मराठी नाही आली तर काय फरक पडतो ? मराठी बोलण्याची काही सक्ती आहे का ? असे उद्धटपणे बोलून प्रश्न त्या सेल्समन तरूणीने आदळआपट करत राग व्यक्त केला.
महिनाभरात या दुकानातील प्रत्येक कर्मचारी मराठी भाषेत बोलला पाहिजे, अन्यथा या दुकानात खरेदी करू नका, असे आवाहन आपण नागरिकांना करणार आहोत, असा इशारा श्रीनिवास घाणेकर यांनी दुकानाच्या व्यवस्थापनाला दिला आहे. त्यामुळे कल्याणमध्ये पुन्हा मराठी आणि परप्रांतीय यांच्या बोली भाषेवरून वाद रंगला आहे. सोमवारी सकाळी घाणेकर कल्याणच्या टिळक चौकातील पटेल आर मार्ट दुकानात वस्तू खरेदीसाठी गेले होते. तेथिल तरूणीने हिंदीतून बोलणे सुरू केले. घाणेकर यांनी तुम्हाला मराठी येत नाही का ? असा सवाल केला. सेल्समन तरूणीने घाणेकर कोण आहेत याचा परिचय नसल्याने त्यांना मराठी बोलण्याची सक्ती आहे का ? नाही आली तर काय फरक पडतो ? अशी उद्धटपणे उत्तरे दिली. शिवाय तरूणीने रागाच्या भरात आदळआपटही केली.
श्रीनिवास घाणेकर यांनी ही सारी माहिती दुकानाच्या व्यवस्थापक मनीषा धस यांना श्रीनिवास घाणेकर यांनी त्यांच्या बाबतीत घडलेला प्रकार सांगितला. व्यवस्थापक धस यांनी दुकानातील प्रत्येक कर्मचाऱ्याला मराठी भाषा येईल, यादृष्टीने प्रयत्न केले जातील. कामगारांना तशा सूचना दिल्या जातील, असे आश्वासन त्यांनी श्रीनिवास घाणेकर दिले.
