नेवाळी : कल्याण पूर्वेतील श्री मलंगगड रोडवरील आंभे बसस्टॉप परिसरात दिवसाढवळ्या घडलेल्या मारहाणीच्या घटनेने परिसरात भीतीचे वातावरण निर्माण झाले आहे. जुन्या किरकोळ भांडणाचा राग मनात धरून आरोपींनी फिर्यादींची गाडी अडवून लोखंडी रॉड व लाकडी दांडक्यांनी बेदम मारहाण केल्याची धक्कादायक घटना समोर आली आहे. या हल्ल्यात अनिल भाग्यवंत याच्या डोक्यात गंभीर दुखापत झाली असून आदित्य भाग्यवंत यालाही मारहाण झाल्याची माहिती पोलिसांनी दिली आहे.
पोलिसांनी दिलेल्या माहितीनुसार तक्रारीनुसार, धर्मा भाग्यवंत, त्यांचे लहान भाऊ व पुतण्या हे आंभे बसस्टॉप येथे आले असता पाच सहा 5-6 अनोळखी तरुणांनी त्यांची गाडी अडवली होती.
यावेळी लाकडी दांडक्याने आदित्यच्या पाठीवर मारहाण करण्यात आली, तर भंडारी याने लोखंडी रॉडने अनिल भाग्यवंत यांच्या डोक्यात वार करून त्यांना गंभीर जखमी केली आहे.
या घटनेतील इतर आरोपींनीही लाकडी दांडक्यांनी मारहाण करण्यात आली तसेच यावेळी शिवीगाळ व जीवे ठार मारण्याची धमकी दिल्याचे फिर्यादींनी पोलीस तक्रारीत नमूद करण्यात आले आहे. या प्रकरणी गुन्हा दाखल करण्यात आला आहे.
या प्रकरणी उल्हासनगर येथील हिललाईन पोलीस ठाण्यात गुन्हे दाखल करण्यात आले आहेत. या घटनेचा पुढील तपास पोलीस उपनिरीक्षक सुरेवाड हे करत आहेत. दरम्यान वाढत्या गुन्हेगारीच्या पार्श्वभूमीवर सार्वजनिक ठिकाणी दहशत माजवणाऱ्यांवर कठोर कारवाई करण्यात येईल, असा इशारा पोलिसांकडून देण्यात येत आहे.
