Thane : कल्याणमध्ये वाहनांच्या प्रकाशात मृतांवर अंत्यसंस्काराची वेळ!

नेवाळी (ठाणे) : पुढारी वृत्तसेवा : कचरा, पाणी, बंद पथदिव्यांमुळे कल्याण शहरातील नागरिकांना जीवन जगणे कठीण झाले आहे. त्यातच आता एखाद्याचा मृत्यू झाल्यानंतर स्मशानभूमीत अंत्यविधीसाठी अनेक अडचणींना तोंड द्यावे लागत आहे. त्यातच आता अंत्यसंस्कार देखील वाहनांच्या प्रकाशात करावे लागत असल्याचं धक्कादायक वास्तव समोर आले आहे. हे चित्र एखाद्या खेड्यापाड्यातील नाही तर स्मार्ट सिटी म्हणून विकसित केल्या जाणा-या कल्याण परिसरातील आहे.

कल्याण पूर्वेतील धक्कादायक प्रकार समोर आला आहे. विठ्ठलवाडी परिसरात एका स्मशानभूमीत संपूर्णपणे अंधारात अंत्यसंस्कार केले जात आहेत. कित्येक तासांपासून या ठिकाणी वीजपुरवठा नसल्याने चक्क अंत्यसंस्कार दुचाकी आणि चारचाकी वाहनांच्या प्रकाशात करावे लागत आहेत. अंत्यविधीसाठी गेलेल्या कुटुंबीयांना याचा मोठा मनस्ताप सहन करावा लागत आहे. या कुटुंबातील नागरिकांना गाडीच्या बॅटरीच्या उजेडात अंत्यविधी उरकावे लागत असल्याने कल्याण महापालिकेविरोधात संताप व्यक्त केला जात आहे.