Vairag City Youth Stoned to Death
वैराग : वैराग शहरातील दत्तनगर परिसरात शनिवारी (दि.२) पहाटे एका युवकाचा दगडाने ठेचून खून करण्यात आल्याची धक्कादायक घटना उघडकीस आली आहे. या प्रकारामुळे परिसरात भीती आणि खळबळ निर्माण झाली आहे. पोलिसांनी या प्रकरणी गुन्हा दाखल करून तिघा संशयितांना ताब्यात घेतले आहे.
मिळालेल्या माहितीनुसार, दिनेश कापसे (वय ३०, रा. वैराग) हा युवक शनिवारी पहाटे दत्तनगर भागात मृतावस्थेत आढळून आला. अज्ञात व्यक्तींनी त्याच्यावर दगडाने वार करत निर्घृणपणे खून केल्याचे प्राथमिक तपासात समोर आले आहे. घटनेची माहिती मिळताच वैराग पोलिस ठाण्याचे पोलिस निरीक्षक कुंदन गावडे यांनी तातडीने आपल्या पथकासह घटनास्थळी धाव घेतली आणि पंचनामा करून परिस्थितीचा आढावा घेतला.
तपासादरम्यान पोलिसांनी घटनास्थळाच्या परिसरातील सीसीटीव्ही फुटेजची तपासणी केली. या आधारे संशयितांची ओळख पटवून तिघांना ताब्यात घेण्यात आले आहे. त्यांची कसून चौकशी सुरू असून, खूनामागील नेमके कारण अद्याप स्पष्ट झालेले नाही.
दरम्यान, या घटनेमुळे दत्तनगर परिसरात भीतीचे वातावरण निर्माण झाले असून, वैराग पोलिसांकडून पुढील तपास सुरू आहे.
