सोलापूर; पुढारी वृत्तसेवा : वीरशैव समाजाचे पंच पिठापैकी एक असलेल्या श्रीक्षेत्र काशी येथील जंगमवाडी मठाचे नूतन उत्तराधिकारी म्हणून बृहनमठ होटगी मठाचे मठाधिपती धर्मरत्न डॉ. मल्लिकार्जुन शिवाचार्य महास्वामी ( डॉ. मल्लिकार्जुन महास्वामी ) यांची निवड करण्यात आली आहे.
बुधवारी कर्नाटकातील धारवाड जिल्ह्यातील बिसनहळी येथे उज्जैनी पिठाचे जगद्गुरु श्री श्री श्री 1008 सिद्धलिंग राजदेशीकेंद्र शिवाचार्य महास्वामीजी, श्रीशैल पिठाचे जगद्गुरु श्री श्री श्री 1008 जगद्गुरु चनसिद्धराम पंडिताराध्य शिवाचार्य महास्वामी यांच्या उपस्थितीत झालेल्या बैठकीत काशी पिठाचे जगद्गुरु श्री श्री श्री 1008 डॉ. चंद्रशेखर शिवाचार्य महास्वामी यांनी आपले उत्तराधिकारी म्हणून होटगी मठाचे मठाधिपती धर्मरत्न डॉ. मल्लिकार्जुन शिवाचार्य महास्वामी यांची निवड जाहीर केली.
यावेळी विविध मठाचे 50 पेक्षा अधिक शिवाचार्य यांची उपस्थिती होती. होटगी मठाच्या गुरुकुलात शिक्षण घेतलेले डॉ. चंद्रशेखर शिवाचार्य यांची काशी पीठ तर भीमाशंकरलिंग शिवाचार्य महास्वामी यांची केदारपीठ, डॉ. चन्नसिद्धाराम पंडिताराध्य शिवाचार्य महास्वामी यांची श्रीशैल पिठाच्या जगद्गुरु म्हणून निवड झाली आहे. या शिवाय 100 पेक्षा अधिक शिवाचाऱ्यांनी शिक्षण या मठातून घेतले आहे. होटगी मठ पाचव्या शतकापासून कार्यरत असून चन्नवीर शिवाचार्य महास्वामी यांनी धर्मप्रसाराबरोबरच शिक्षणाची सेवा उपलब्ध करून दिली आहे. ( डॉ. मल्लिकार्जुन महास्वामी )
या मठाचे मठाधिपती तपोरत्नं योगीराजेंद्र शिवाचार्य महास्वामी यांनी याचा विस्तार केला. त्यांनी 'सिद्धांत शिखामणी वेदांत तत्व नाम गणेशणम' या संस्कृत विषयात पीएच. डी. केली आहे. कन्नड, मराठी, तेलुगू, हिंदी, संस्कृत आणि इंग्रजी या सहा भाषेवर त्यांचे प्रभुत्व आहे. सामाजिक शैक्षणिक संस्कृतिक आणि सामाजिक कार्यामध्ये अग्रेसर राहून त्यांचे कार्य चालू आहे. शेतीचीही त्यांना आवड असून पारंपरिक शेतीबद्दल जागृती करीत आहेत. काशी पिठाचे उत्तराधिकारी म्हणून त्यांची निवड झाल्याने लिंगायत व वीर्शैव समाजामधून आनंद व्यक्त होत आहे.
बालपण व शिक्षण ( डॉ. मल्लिकार्जुन महास्वामी )
डॉ. मल्लिकार्जुज महास्वामी हे मूळचे जालहळ्ळी (रा. तळवारगेरी, आंचेसुगूर, ता. देवदुर्ग, जि. रायचूर, कर्नाटक) येथील असून अक्कनागम्मा व कोडय्या स्वामी यांचे ते सुपूत्र आहेत. त्यांचे प्राथमिक शिक्षण जे. जे. शिक्षण संस्था, जालहळ्ळी येथे झाले. महाविद्यालयीन शिक्षण संगमेश्वर महाविद्यालय, सोलापूर तर उच्च शिक्षण 'राष्ट्रीय संस्कृत विद्यापीठ' तिरुपती येथे झाले. अविश्रांत परिश्रम घेवून प्राकशास्त्री व आचार्य पी. जी. डिप्लो इन योगा या परीक्षेत उत्तुंग यशाचे शिखर गाठले. वाक्प्रभुत्व असणारे महास्वामीनी संस्कृत भाषेवर प्रभुत्व मिळविले.
काशी पिठाकडूनच धर्मरत्न पदवी ( डॉ. मल्लिकार्जुन महास्वामी )
काशी जगद्गुरु श्री श्री श्री १००८ डॉ. चंद्रशेखर शिवाचार्य महास्वामींच्या मार्गदर्शनाने 'सिध्दांत शिखामणी वेदान्त तत्वनाम गवेषणम्' या विषयाची निवड केली. 'सिध्दांत शिखामणी' यातील अद्वैत वेदान्त-सिध्दांत या विषयावर २०१३ साली अभ्यासपूर्ण संशोधन पूर्ण केले. बाळीवेस येथील मद्विरशैव गुरुकुल संस्कृत पाठशाला येथून त्यांच्या धार्मिक, आध्यात्मिक कार्यावर प्रसन्न होवून काशीपीठचे ज्ञानसिंहासनाधिश्वर जगद्गुरु डॉ. चंद्रशेखर शिवाचार्य महास्वामीनी त्यांना 'धर्मरत्न' ही नामभिदान देऊन त्यांचा गौरव केला.
