पंढरपूर : श्री विठ्ठल-रुक्मिणी मातेच्या नित्यपूजा, पाद्यपूजा, तुळशी अर्चन पूजा, महानैवेद्य सहभाग योजना इत्यादी सर्व प्रकारच्या पूजा श्री विठ्ठल-रुक्मिणी मंदिर समितीकडून भाविकांना उपलब्ध करून देण्यात येतात. दि. 1 जानेवारी ते 31 मार्च 2026 या कालावधीतील पूजांची ऑनलाईन पद्धतीने नोंदणी करण्याची सुरुवात दि. 26 डिसेंबर रोजी सकाळी 11 वाजल्यापासून होत असल्याची माहिती मंदिर समितीचे सहअध्यक्ष गहिनीनाथ महाराज औसेकर यांनी दिली.
याबाबत मंदिर समितीच्या नुकत्याच झालेल्या सभेत निर्णय घेण्यात आला होता. यासाठी संगणकप्रणाली विकसित करण्यात आली आहे. भाविकांना पूजेची नोंदणी मंदिर समितीच्या अधिकृत संकेतस्थळावरून करता येणार आहे.
यापूर्वी चार टप्प्यांत राज्याच्या विविध कानाकोपऱ्यातून व देशभरातून कर्नाटक, आसाम, आंध्र प्रदेश इत्यादी राज्यातील भाविकांनी पूजेची नोंदणी केली होती. यास भाविकांचा चांगला प्रतिसाद मिळत आहे. आता, पाचव्या टप्प्यात दि. 1 जानेवारी ते 31 मार्च, 2026 या कालावधीतील सण, उत्सव व गर्दीचे दिवस वगळून इतर दिवशीच्या श्रींच्या नित्यपूजा, पाद्यपूजा व महानैवेद्य सहभाग योजना तसेच दि. 1 ते 31 जानेवारी, 2026 कालावधीतील तुळशी अर्चन पूजा ऑनलाईन नोंदणीसाठी भाविकांना उपलब्ध करून देण्यात येत आहेत. ऑनलाईन नोंदणीसाठी काही अडचणी आल्यास मंदिर समितीच्या नित्योपचार कार्यालयातून नोंदणी करून देण्यास मदत व आवश्यक ते मार्गदर्शन करण्यात येईल. पूजेचे बुकिंग मंदिर समितीच्या अधिकृत संकेतस्थळावरूनच करावे कोणत्याही त्रयस्थ व्यक्तीस संपर्क करू नये असे आवाहन कार्यकारी अधिकारी राजेंद्र शेळके यांनी यावेळी सांगितले.
विविध पूजेसाठी देणगी मूल्य
श्री विठ्ठल व श्री रुक्मिणीमातेच्या नित्यपूजेसाठी अनुक्रमे 25 हजार रुपये, 11 हजार रुपये तसेच पाद्यपूजेसाठी पाच हजार रुपय व तुळशी अर्चन पूजेसाठी 2100 रुपये तसेच महानैवेद्य सहभाग योजनेसाठी सात हजार रुपये देणगी मूल्य आहे.
