पंढरपूर : शाहू महाराजांकडून विठ्ठलास सोन्याची राखी

पंढरपूर : कोल्हापूर येथील शाहू महाराज यांनी पंढरपूर येथील विठ्ठलास सोन्याची राखी बांधण्याची परंपरा यावर्षीही कायम राखली. शाहू महाराज यांचे निकटवर्तीय महादेव तळेकर यांनी ही राखी श्री विठ्ठल-रुक्मिणी मंदिर समितीकडे दिली. यांनतर श्री विठ्ठलास सोन्याची राखी बांधण्यात आली.

गेल्या अनेक वर्षांपासून कोल्हापूरच्या छत्रपती शाहू महाराज घराण्याकडून श्री विठ्ठलास राखी बांधण्याची परंपरा आहे. रक्षाबंधन दिन व नारळी पौर्णिमेनिमित्त श्री विठ्ठलास दरवर्षी सोन्याची राखी बांधली जाते. आजही सोन्याची राखी विठ्ठलास बांधत शाहू महाराज यांनी परंपरा कायम सुरु ठेवली. नारळी पौर्णिमा व रक्षाबंधन दिनानिमित्त श्री विठ्ठलास सोन्याची राखी व अलंकार, पोशाख परिधान करण्यात आल्याने विठ्ठलाचे रुप अधिक खुलून दिसत होते. दर्शनासाठी आलेल्या भाविकांमधून विठूरायाच्या हातातील सोन्याची राखी पाहून समाधान व्यक्त केले जात आहे.