मोहोळ : शहरातील जिल्हा परिषद प्राथमिक शाळेच्या जागेवर नगरपरिषदेची नवीन प्रशासकीय इमारत उभारण्याच्या हालचालींना आता गंभीर वळण मिळाले आहे. शाळेच्या मुख्य प्रवेशद्वारावरील कुलूप शिवसेना शिंदे गटाचे विद्यमान नगरसेवक रमेश बारसकर चेतन देशमूख अजय कुर्डे बंडू देशमूख कंत्राटी सफाई कामगार यांना पुढे करून कुलुप तोडून आत प्रवेश केला. या प्रकारामुळे शहरात परिसरात खळबळ उडाली आहे. या प्रकरणी शाळेचे मुख्याध्यापक सोनटक्के , गवळी यांना वरिष्ठांनी आदेश दिला की, पोलिस ठाण्यात तक्रार दाखल करून संबंधितांविरुद्ध गुन्हा दाखल करणार असल्याची माहिती दिली.
मोहोळ शहराच्या शैक्षणिक आणि ऐतिहासिक वारशाचे प्रतीक मानल्या जाणाऱ्या जिल्हा परिषद प्राथमिक शाळेच्या जागेवर नगरपरिषदेची इमारत उभारण्याचा प्रस्ताव चर्चेत आहे. मात्र, या प्रस्तावाला नागरिक, माजी विद्यार्थी तसेच शाळेशी संबंधित घटकांकडून विरोध होत असतानाच शाळेच्या मुख्य गेटचे कुलूप तोडण्यात आल्याचा प्रकार समोर आल्याने वाद आणखी चिघळण्याची शक्यता आहे.
शाळेच्या मालमत्तेत अनधिकृत प्रवेशाचा आरोप
शाळेच्या मुख्य प्रवेशद्वाराचे कुलूप कोणाच्या आदेशाने आणि कोणत्या अधिकाराने तोडण्यात आले, याबाबत आता प्रश्न उपस्थित होत आहेत. संबंधित व्यक्तीला शाळेच्या मालमत्तेत प्रवेश करण्याचा अधिकृत अधिकार होता का? कुलूप तोडण्यास कोणाची परवानगी होती? तसेच नगरपरिषद इमारतीसाठी शाळेची जागा वापरण्याचा अधिकृत निर्णय झाला आहे का, याची चौकशी होण्याची मागणी होत आहे.
मुख्याध्यापकांकडून पोलिसांत धाव
या प्रकाराची गंभीर दखल घेत शाळेचे मुख्याध्यापक पोलिस ठाण्यात तक्रार दाखल करण्याच्या तयारीत आहेत. शाळेच्या प्रवेशद्वाराचे कुलूप तोडणे, शाळेच्या परिसरात अनधिकृत प्रवेश करणे अथवा मालमत्तेचे नुकसान झाले असल्यास त्याबाबत संबंधित कायदेशीर तरतुदींनुसार कारवाई करावी, अशी मागणी तक्रारीत केली जाण्याची शक्यता आहे. दरम्यान, शाळेची जागा नगरपरिषदेच्या प्रशासकीय इमारतीसाठी वापरण्याबाबतचा संपूर्ण प्रशासकीय निर्णय, जागेची मालकी, हस्तांतरणाची प्रक्रिया, शासकीय मंजुरी आणि संबंधित ठराव यांची माहिती सार्वजनिक करण्याची मागणी नागरिकांकडून होत आहे.
कुलूप कोणी, कोणाच्या आदेशाने तोडले?
शाळेच्या गेटचे कुलूप तोडण्याचा अधिकार संबंधित नगरसेवकांना कोणी दिला, असा थेट सवाल आता उपस्थित केला जात आहे. अधिकृत परवानगी नसताना कुलूप तोडण्यात आले असे सिद्ध झाल्यास संबंधितांवर कायदेशीर कारवाई होणार का, याकडे मोहोळकरांचे लक्ष लागले आहे. शाळेच्या जागेचा प्रश्न आधीच संवेदनशील बनलेला असताना कुलूप तोडण्याच्या घटनेमुळे नगरपरिषद प्रशासन आणि शिक्षण विभागासमोरही अनेक प्रश्न निर्माण झाले आहेत. पोलिस तक्रारीनंतर या प्रकरणाला कोणते वळण मिळते, हे पाहणे महत्त्वाचे ठरणार आहे.
शाळेची जागा वाचविण्यासाठी नागरिक आक्रमक
दरम्यान, शाळेच्या जागेचा वापर नगरपरिषद इमारतीसाठी करण्यास विरोध करणारे नागरिक आणि माजी विद्यार्थी आता आक्रमक भूमिका घेण्याच्या तयारीत आहेत. शाळेचा ऐतिहासिक वारसा अबाधित ठेवावा आणि कोणत्याही दबावाखाली शाळेची जागा हस्तांतरित करू नये, अशी शहरातून नागरिकाची मागणी जोर धरू लागली आहे.
