पंढरपूर : कार्तिकी यात्रा एकादशीचा मुख्य सोहळा आज पंढरपूर येथे साजरा होत आहे. कार्तिकी यात्रा लाखोंच्या संख्येने आलेल्या भाविकांना श्री विठ्ठल-रुक्मिणीचा प्रसाद म्हणून बुंदी लाडू व राजगिरा लाडू देण्यात येत आहे. मंदिर समितीमार्फत 8 लाख बुंदी व 1 लाख राजगिरा लाडू प्रसाद तयार करण्यात आले आहेत. दशमी, एकादशी, द्वादशीपर्यंत भाविक मोठ्या प्रमाणात पंढरपूर येथे वास्तव्य करतात. त्यामुळे यात्रा कालावधीत आलेल्या भाविकांना लाडू प्रसाद विक्री केंद्रांवर उपलब्ध असल्याची माहिती कार्यकारी अधिकारी राजेंद्र शेळके यांनी दिली.
श्री विठ्ठल-रुक्मिणीमातेच्या दर्शनासाठी येणारा प्रत्येक भाविक दर्शन झाल्यानंतर श्री विठ्ठल- रुक्मिणीचा प्रसाद म्हणून बुंदी व राजगिरा लाडू प्रसाद खरेदी करत असतो. या प्रत्येक भाविकांना लाडू प्रसाद मिळेल, यादृष्टीने 8 लाख बुंदी लाडू प्रसाद व 1 लाख राजगिरा लाडू प्रसादाची उपलब्धी ठेवण्यात येत आहे. यामध्ये बुंदी लाडू प्रसाद मंदिर समितीमार्फत व राजगिरा लाडू प्रसाद आऊटसोर्सिंग पद्धतीने खरेदी करण्यात आला आहे.
70 ग्रॅम वजनाचे दोन बुंदी लाडू कागदी पिशवीत पॅकिंग करून प्रति पाकीट 20 रुपयेप्रमाणे व 25 ग्रॅम वजनाचे दोन राजगिरा लाडू पॅकिंग करून प्रति पाकीट 10 रुपयेप्रमाणे भाविकांना विक्री करण्यात येत आहेत. यासाठी पश्चिमद्वार, उत्तरद्वार, श्री संत तुकाराम भवन असे एकूण तीन स्टॉल असून, सर्व स्टॉल 24 तास खुले ठेवण्यात आले आहेत.
या लाडू प्रसादाची शासकीय प्रयोगशाळेतून खाण्यास योग्य असल्याबाबत तपासणी करून घेण्यात आली आहे. प्रसाद तयार करण्याचे काम सुमारे 90 कर्मचारी 24 तास परिश्रम घेत आहेत.
बुंदी लाडू प्रसाद एमटीडीसी भक्तनिवास येथील लाडू उत्पादन केंद्रामध्ये हरभरा डाळ, साखर, शेंगदाणा डबल रिफाइंड तेल, काजू, बेदाणा, विलायची या सुका मेव्याच्या पदार्थांपासून तसेच अन्न व औषध प्रशासनाच्या सर्व नियमांचे पालन करून तयार करण्यात येत आहे.
