मोहोळ; पुढारी वृत्तसेवा : सोलापूरहून दिल्लीच्या दिशेने जाणार्या कर्नाटक एक्स्प्रेस (क्र.12627) या गाडीच्या इंजिनमध्ये रविवारी सकाळी पावणे नऊच्या सुमारास शॉर्टसर्किटने अचानक आग लागली. चालकाने सतर्कता दाखवत गाडी थांबवली. घटनेत कोणतीही जीवितहानी झाली नाही. चालक मात्र आग विझविण्याच्या प्रयत्नात भाजला गेला. घाटणे ग्रामस्थांनी भाजलेले चालक विकास कुमार यांना मोहोळ शासकीय रुग्णालयात भरती केले. दोन तासांनंतर गाडी पुन्हा मार्गस्थ झाली.
रविवारी सकाळी 7 वाजून 30मिनिटांनी सोलापूरहून दिल्लीच्या दिशेने कर्नाटक एक्स्प्रेस मार्गस्थ झाली. पुढे मोहोळ – मलीकपेठ मार्गावर गेट क्र. 148 जवळ घाटणे गावाजवळ गाडी पोहोचताच इंजिनमधून अचानक धूर बाहेर पडताना रेल्वे चालकाच्या निदर्शनास आले. त्यांनी तत्काळ याची माहिती कंट्रोल रूमला दिली. कंट्रोल रूमला माहिती मिळताच या मार्गावरील धावणार्या इतर गाड्या नजीकच्या स्थानकावर थांबवून ठेवण्यात आल्या. रेल्वेगाडी चालक विकास कुमार आग विझविण्याच्या प्रयत्नात भाजला गेल्याने त्यास मोहोळ येथे उपचारासाठी दाखल केल्याची माहिती अधिकार्यांनी दिली. रेल्वे चालकाच्या तत्परतेमुळे मोठा अनर्थ टळला. यात कोणतीही जिवीतहानी झाली नाही. इंजिनमागील जनरल डब्यातील प्रवाशांना खाली उतरवल्याने सर्व प्रवासी सुखरूप असल्याचे माहिती अधिकार्याने दिली.
