फलटण येथे चोरीच्या मोटारी विकल्यानंतर आलेल्या पैशांच्या वाटणीवरून झालेल्या वादातून एकाचा धारदार शस्त्राने खून झाला.
फलटण येथे घडलेल्या या घटनेप्रकरणी तिघांविरोधात फलटण शहर पोलिस ठाण्यात गुन्हा दाखल करण्यात आला आहे. या घटनेत मृताची पत्नीही गंभीर जखमी झाली आहे.
राचुर्या एकनाथ काळे (वय 29, रा. बरड, ता. फलटण) असे खून झालेल्या युवकाचे नाव आहे. तर रोशनी राचुर्या काळे (23, दोघे सध्या रा. बरड, ता. फलटण) असे जखमी महिलेचे नाव आहे. संशयित पप्या ऊर्फ शुरवीर पवार (पूर्ण नाव, गाव माहीत नाही.) तसेच अनोळखी एक महिला व एक पुरुष यांच्यावर गुन्हा दाखल झाला आहे.
या घटनेची फिर्याद सोमनाथ माणिक मोहिते यांनी दिली आहे. रविवार दि. 8 रोजी सकाळी 11.30 वाजण्याच्या सुमारास सोमवार पेठ येथे फिर्यादिच्या घरी राचुर्या काळे, त्याची पत्नी रोशनी काळे व संशयित पप्या आले होते. तेथे त्यांनी फिर्यादी सोमनाथ यांच्याकडे जेवण केले. त्यानंतर ते तिघेही तेथून बाहेर पडले.
दरम्यान, भांडणाचाआवाज आल्याने फिर्यादीने बाहेर जावून पाहिले त्यावेळी या तिघांमध्ये वाद सुरु होता. या वादातून चिडून जावून पप्या पवार याने धारधार सुर्याने रोशनी काळे हिच्या डोक्यावर वार करुन तिला जखमी केले. या हल्ल्यात पत्नी रोशनी जखमी झाल्याचे पाहून राचुर्या काळे हा पप्याच्या अंगावर धावून गेला. यावेळी पप्याने राचुर्यावर वार करुन त्याचा निर्घृण खून केला असल्याचे फिर्यादित म्हटले आहे.
दरम्यान, घटनेचे वृत्त कळताच फलटण पोलिस घटनास्थळी धावले. त्याचवेळी अप्पर पोलिस अधीक्षक धीरज पाटील, फलटण डी.वाय.एस.पी. गणेश किंद्रे यांनी प्रत्यक्ष जागेवर जावून पाहणी करुन तपासाच्या सूचना दिल्या. तपास सपोनि गायकवाड करत आहेत.
