सातारा जिल्हा मध्यवर्ती सहकारी बँक निवडणुकीचे धुमशान सुरू झाले असून सोमवारी उमेदवारी अर्ज दाखल करण्याच्या पहिल्या दिवशी कै. विलासराव पाटील – उंडाळकर यांचे पुत्र ॲड. उदयसिंह पाटील यांनी सोसायटी मतदारसंघातून आपला उमेदवारी अर्ज दाखल केला. निवडणूक अधिकारी मनोहर माळी यांचेकडे उमेदवारी अर्ज दाखल करण्यात आला आहे.
स्व. यशवंतराव चव्हाण, स्व. आबासाहेब वीर यांच्या मार्गदर्शनाखाली १९६७ साली कराड सोसायटी मतदारसंघातून विलासराव पाटील यांनी जिल्हा बँकेत प्रवेश केला. सलग ११ वेळा याच मतदारसंघातून काका बँकेत संचालक राहिले. बँकेचे उपाध्यक्ष, अध्यक्ष, मार्गदर्शक अशा भूमिका बजावत सातारा बँकेचा नावलौकिक देशभर वाढवला. स्व.चव्हाणसाहेब, स्व. आबासाहेब वीर यांनी घालून दिलेले आदर्श पुढे घेऊन जात बँकेच्या सर्वांगीण विकासात मोलाचे योगदान दिले. काका बँकेचे संचालक असतानाच ४ जानेवारी २०२० रोजी त्याचे निधन झाले.
काकांच्या जागेवर त्यांचे सुपुत्र उदयसिंह पाटील यांची नियुक्ती सर्वानुमते ठरली. मात्र तोपर्यंत बँकेची निवडणूक जाहीर झाल्याने काकांचा वारसा राजकारण, समाजकारणा बरोबर सहकारात चालवण्यासाठी उदयसिंह पाटील यांनीच काकांचे जागेवर निवडणूक लढवावी असा आग्रह कराड तालुक्याबरोबर जिल्ह्यातील सहकार क्षेत्रातील नेतेमंडळी, कार्यकर्ते यांनी धरला होता. उदयसिंह पाटील यांनी या सूचनेनुसार वरिष्ठ नेतेमंडळीच्या सल्ल्याने व कराड सोसायटी मतदारसंघातील मतदाराची चर्चा करून उमेदवारी निश्चित केली होती. आज पहिल्याच दिवशी उदयसिंह पाटीलांनी उमेदवारी अर्ज दाखल केला.
