सातारा : पुढारी वृत्तसेवा
मुख्यमंत्री लाडकी बहीण योजनेसाठी नारी शक्तीदूत अॅपद्वारे अर्ज भरताना संबंधित महिलेचे नाव, जन्मदिनांक, संपूर्ण पत्ता आदी माहिती आधारकार्डनुसारच भरणे अनिवार्य करण्यात आले आहे. तसेच आता गावपातळीवर ऑनलाईन अर्ज भरताना येणार्या समस्या पाहता ऑफलाईन अर्ज भरण्याची सुविधा सुरु करण्यात आली आहे. मुख्यमंत्री माझी लाडकी बहीण योजनेसाठी सध्या सातारा जिल्ह्यात मोठ्या प्रमाणात अर्ज भरण्यात येत आहेत. लाभार्थी महिलेला दीड हजार रुपयांची रक्कम थेट डीबीटीद्वारे खात्यावर जमा होणार आहे. त्यामुळे त्यात कोणतीही अडचण येवू नये यासाठी महिला बालकल्याण विभागमार्फत परिपत्रक जारी केले आहे.
नारी शक्तीदूत अॅपमध्ये लाभार्थी महिलेचे नाव भरताना त्यांच्या आधारकार्डवर जे नाव लिहिले आहे तेच नाव अर्जात लिहावे. आधारकार्डवरील जन्म दिनांक अॅपमध्ये नोंदवावा. आधारकार्डवर जन्मदिनांक नसल्यास जन्म दाखल्यावरून जन्मदिनांक घेण्यात यावा. आधारकार्डनुसार अर्जदाराचा संपूर्ण पत्ता आणि अन्य माहिती तंतोतंत भरावी, अशी सूचनाही करण्यात आली आहे. आधारकार्डवरील नावाप्रमाणे बँकेच्या खात्यावरही तेच नाव असल्याची खातरजमा करावी. आधार क्रमांक बँकेशी संलग्न असल्याची खात्री करून तशी माहिती अॅपमध्ये भरावी, अशी सूचना करण्यात आली आहे.
नारी शक्तीदूत अॅपद्वारे मुख्यमंत्री माझी लाडकी बहीण योजनेसाठी ऑनलाईन अर्ज भरण्यात येत आहेत. मात्र गावपातळीवर अर्ज भरताना काही अडचणी येत आहेत. दुसरीकडे अर्ज भरण्यासाठी गर्दी होत आहे. त्यामुळे गर्दी टाळण्यासाठी गावपातळीवर ऑफलाईन पध्दतीने पात्र लाभार्थ्यांचे अर्ज भरून घेण्यात यावेत. त्यासाठी ग्रामपंचायतीमध्ये वॉर्डनिहाय शिबिरांचे आयोजन करण्याच्या सूचनाही देण्यात आल्या आहेत.
गावपातळीवर ग्रामसेवक, तलाठी, अंगणवाडी सेविका, मदतनीस, आशा सेविका, नागरी, सेतू केंद्रातील प्रतिनिधी, समुदाय संसाधन व्यक्ती यांची समिती स्थापन करण्याच्या सूचना देण्यात आल्या आहेत. ऑनलाईन अर्ज पूर्ण भरण्यासाठी अंगणवाडी सेविका, मदतनीस, आशा सेविका, नागरी सेतू केंद्रातील प्रतिनिधी, समुदाय संसाधन व्यक्ती यांना प्रति अर्ज 50 रुपयांप्रमाणे प्रोत्साहन भत्ता सरकारतर्फे देण्यात येणार असल्याची माहिती महिला व बालकल्याण विभागाचे उपमुख्य कार्यकारी अधिकारी रोहिणी ढवळे यांनी दिली.
