सातारा : ४८ तासांत कोयना धरणात १० टीएमसी पाणीसाठा

पाटण; पुढारी वृत्तसेवा :  कोयना धरणांतर्गत विभागासह पाटण तालुक्यातही गुरुवारी पावसाचा जोर कमी झाला आहे. तरीही धरणांतर्गत विभागातून प्रतिसेकंद सरासरी 58,591 क्यूसेक पाण्याची आवक होत असल्यामुळे धरणातील पाणीसाठ्यात समाधानकारक वाढ होत आहे. गुरुवारी सायंकाळी पाच पर्यंत गेल्या आठ्ठेचाळीस तासांत कोयना धरणात 10 टीएमसी पाणीवाढ झाली आहे.

कोयना धरणात सध्या एकूण उपलब्ध पाणीसाठा 39.09 टीएमसी तर उपयुक्त पाणीसाठा 34.09 टीएमसी इतका झाला आहे. चोवीस तासांत या पाणीसाठ्यात 5.06 टीएमसीने तर पाणी उंचीत 8 फूट 8 इंच वाढ झाली आहे. कोयना धरणांतर्गत कोयना, नवजा, महाबळेश्वर येथेही पावसाचा जोर कमी झाला असला तरी धरणातील पाणीसाठ्यात समाधानकारक वाढ होत आहे. 105.25 टीएमसी पाणी साठवण क्षमता असलेल्या या धरणात सध्या एकूण क्षमतेच्या 37.14 टक्के इतका पाणीसाठा झाला आहे. धरणाची जलपातळी 637.794 मीटर झाली आहे. धरण पूर्ण क्षमतेने भरण्यासाठी अद्याप 66.16 टीएमसी पाण्याची आवश्यकता आहे.