सातारा, पुढारी वृत्तसेवा : Udayanraje vs Shivendraraje : सातारा नगरपालिका निवडणुकीच्या पार्श्वभूमीवर भाजपचे खासदार उदयनराजे आणि आमदार शिवेंद्रराजे भोसले यांच्यामध्ये चांगलाच वाद पेटला आहे. खासदार उदयनराजे भोसले यांनी सातारच्या विकासकामांच्या शुभारंभाचा चांगला धडाका उडवला आहे. यावर बोलताना शिवेंद्रराजे यांनी उदयनराजेंनी चालवलेली दुचाकी आणि पोस्टर बाजीचा चांगलाच समाचार घेतला आहे.
उदयनराजेंनी दुचाकी चालवण्यापेक्षा पाच वर्षे सातारची नगरपालिका व्यवस्थित चालवली असती तर एवढी पोस्टर बाजी करण्याची वेळ आली नसती. पोस्टरबाजीवर खर्च करण्यापेक्षा सातारच्या विकासकामांवर खर्च केला असतातर बरं झालं असत. नगरपालिकेची निवडणूक जवळ आल्याने खा. उदयनराजे यांची ही नौटंकी सुरू असल्याचे टोला आ.शिवेंद्रसिंहराजे यांनी लगावला.
खासदार उदयनराजेनीं एकदा आरोग्य मंत्र्यांची भेट घेतली आणि मेडिकल कॉलेजचा प्रश्न सुटला असं नसून मेडिकल कॉलेज साठी सर्वांनी प्रयत्न केले आहेत.
मग 10 वर्षे खासदार असताना आरोग्यमंत्री यांनी भेट दिली नाही का ? की आरोग्यमंत्री यांचा पत्ता माहीत नव्हता असा खोचक सवाल या वेळी आ.शिवेंद्रराजे यांनी विचारला.
रामराजे ना शिव्या देता आणि त्यांच्याशीच चर्चा करता ?असा टोला आ शिवेंद्रसिंहराजे नि लगावला.
सातारा सर्किट हाऊस वर झालेल्या उदयनराजे आणि रामराजे यांच्या भेटीवर बोलताना शिवेंद्रराजे म्हणाले ज्या राम राजांना दाखवतो आणि बघतो ची भाषा केली त्यांच्याशी चर्चा करायला कशाला जायचं. आपलं घराणं कुठलं? छत्रपती घराणे आहे असा खोचक टोला त्यांनी यावेळी लगावला.
