सातारा : कोयना धरण पायथा वीजगृहातून पाणी सोडले
पाटण, पुढारी वृत्तसेवा : कोयना धरणांतर्गत विभागात सुरू असलेल्या पावसामुळे धरणात प्रतिसेकंद सरासरी ५०,८७३ क्युसेक्स पाण्याची आवक होत आहे. सध्या उपलब्ध पाणीसाठा ८३.५० टीएमसी असून धरण पूर्ण क्षमतेने भरण्यासाठी यापुढे २१.७५ टीएमसी पाण्याची गरज आहे.
सध्या धरणातील उपलब्ध पाणीसाठा व पाणी सामावून घेण्याची क्षमता लक्षात घेऊन गुरुवारी (दि. ११) दुपारी तीन वाजता कोयना धरण पायथा वीजगृहातून दोन जनित्राद्वारे वीजनिर्मिती करून प्रतिसेकंद २१०० क्युसेक्स पाणी पूर्वेकडे कोयना नदीच्या पात्रात सोडण्यात आले आहे. पूर्वेकडे पडणारा पाऊस व धरणातून सोडलेल्या पाण्यामुळे कोयना नदीच्या पाणी पातळीत लक्षणीय वाढ झाल्याने प्रशासनाने नदीकाठच्या गावांना सावधानतेचा इशारा दिला आहे.
अद्याप धरणाचे सहा वक्री दरवाजे वर उचलून त्यातून कोणत्याही प्रकारे विनावापर पाणी सोडण्यात आलेले नाही अथवा याबाबत तूर्तास कोणताही निर्णय घेतला नसल्याची माहिती कोयना धरण व्यवस्थापनाकडून देण्यात आली आहे.
