मिरज : पुढारी वृत्तसेवा : मिरज शासकीय वैद्यकीय महाविद्यालय व रुग्णालय येथे सुपरस्पेशालिटी रुग्णालयाचे बांधकाम व विद्यार्थी वसतिगृह बांधकामाला तत्वत: मान्यता देण्यासंदर्भातील कार्यवाही पूर्ण करावी, अशा सूचना वैद्यकीय शिक्षण मंत्री हसन मुश्रीफ यांनी बुधवारी दिल्या.
मिरज येथील शासकीय वैद्यकीय महाविद्यालय व रुग्णालयातील इमारत बांधकाम व अन्य सोयी-सुविधांबाबत झालेल्या आढावा बैठकीच्या ते बोलत होते. पालकमंत्री सुरेश खाडे उपस्थित होते.
वैद्यकीय शिक्षण मंत्री यांच्या मंत्रालयातील दालनात झालेल्या या बैठकीस खा. संजय पाटील, वैद्यकीय शिक्षण विभागाच्या सचिव डॉ. अश्विनी जोशी, वैद्यकीय शिक्षण व आयुष्यचे आयुक्त राजीव निवतकर, वैद्यकीय शिक्षण व संशोधन संचालक डॉ. अजय चंदनवाले, जिल्हाधिकारी डॉ. राजा दयानिधी, कार्यकारी अभियंता कीर्तीकुमार मिरजकर, वैद्यकीय अधीक्षक डॉ. रूपेश शिंदे उपस्थित होते.
या बैठकीत शासकीय वैद्यकीय महाविद्यालय व रुग्णालय, मिरज येथे सुपरस्पेशालिटी हॉस्पिटल बांधणे व विद्यार्थ्यांच्या वसतिगृहाची इमारत बांधकाम करण्यासंदर्भात तत्वत: मान्यता देण्यासंदर्भातील कार्यवाही पूर्ण करावी, अशा सूचना मंत्री मुश्रीफ यांनी सचिव, वैद्यकीय शिक्षण यांना दिल्या. त्यानंतर हा प्रस्ताव केंद्र शासनाला सादर करण्यात येईल. या प्रस्तावातर्गंत 200 खाटांचे रुग्णालय बांधकाम तसेच पदव्युत्तर वैद्यकीय शिक्षण घेणार्या विद्यार्थ्यांसाठी वसतिगृह, अध्यापक व इतर मनुष्यबळ, यंत्रसामुग्री व साधन सामुग्री यांचा समावेश आहे.
प्रधानमंत्री जनविकास कार्यक्रमाअंतर्गत वैद्यकीय शिक्षण व संशोधन विभागाच्या अधिपत्याखालील शासकीय वैद्यकीय महाविद्यालयामध्ये अल्पसंख्याक विद्यार्थ्यांसाठी एकूण 13 अभ्यासक्रम राबविण्याबद्दल बैठकीत चर्चा करण्यात आली. या प्रस्तावांतर्गत बांधकामासाठी आकारण्यात आलेले दर तपासून सार्वजनिक बांधकाम विभागाने पुन्हा सादर करण्याबाबत प्रशासकीय मान्यता तत्काळ मिळवण्याबाबत कार्यवाही करण्याच्या सूचना मुश्रीफ यांनी दिल्या. तसेच, पॅरामेडिकल सायन्स योजना अंतर्गत महाविद्यालयाच्या बांधकामासाठीचा प्रस्ताव पुन्हा सादर करण्याच्या सूचना दिल्या. दोन महिन्यांच्या आत आवश्यक कार्यवाही करुन निधी मागणीचा प्रस्ताव सादर करण्याच्या सूचना पालकमंत्री खाडे यांनी दिल्या.
नर्सिंग महाविद्यालय सुरू करण्याचा प्रस्ताव
शासकीय वैद्यकीय महाविद्यालय व रुग्णालयात भारतीय परिचर्या परिषदेच्या मानकांनुसार पुरेसा नर्सिंग स्टाफ नसल्यामुळे विविध आजारांवर उपचार करताना अपुरे मनुष्यबळ व साधने यांच्या मर्यादा येत आहेत. या पार्श्वभूमीवर या रुग्णालयात 100 प्रवेश क्षमतेचे बी. एस्सी नर्सिंग महाविद्यालय सुरू केल्यास त्याचा फायदा जिल्ह्याला होईल. या अनुषंगाने बैठकीत चर्चा करण्यात आली. यावर पुढील मंत्रीमंडळ बैठकीपर्यंत प्रस्ताव सादर करण्यात येईल, अशी माहिती वैद्यकीय शिक्षण उपसचिव सूर्यवंशी यांनी दिली.
